20.8.2014

Inatsisartut siulittaasuannut Lars Emil Johansen-imut allakkat ammasut

Inuit Ataqatigiit ajuusaarutigaat akuersaaruminaatsillugulu Inatsisartut Allattoqarfiannit Inatsisartut ataatsimiittarfissaattut nutaatut sanaassap sumiinnissaa-nut tunngasumik illuinnaasiortumik Nuummi innuttaasunut tamanut nassiussuisoqarsimanera taamatullu aamma Facebook-ikkut sunniiniartoqarnera.

Inuit Ataqatigiit isumaqarput Kommuneqarfik Sermersuup sapaatit akunneranni matumani tusarniaaneranut akulerunneq pissusissamisuungitsoq, tassami Nuummi inuttaasut taamaalillutik ataatsimiittarfittaap sumiinnissaanut  isummernissaminnut periarfissinneqaraluarput. Innuttaasut sinnerlugit qinikkatut uagut salliulluta innuttaasut namminneerlutik isummersinnaanerat ataqqisariaqaraluarparput.

Inuit Ataqatigiitnni aamma oqaatsit atorneqartut kiisalu assit allanngortitikkat quppersakkami tamanut agguaanneqarsimasumi atorneqartut isornartoqartippaat. Nuummi illoqarfiup immikkoortuisa ilaat qinikkat ataatsimiittarfissaannut inissiivissatut ”ataqqinannginnerarlugit” tikkuaaneq aammalu assit graffitinik titartagalersukkat akuersaaruminaatsippagut.
Piumasaraarput Inatsisartut siulittaasuata innutaasunut erseqqissassagaa sunniiniarneq nammineerluni Inatsisartullu Allattoqarfiata akisussaaffigalugu.

Tamanna pisariaqarpoq amerlasuunit isumaqartoqalermat Inatsisartut tamarmiullutik ataatsimiittarfiup ”Aqqaluup Aneerasaartarfiani” inissinneqarnissaanut isumaqataasut aammalu Inatsisartunut ilaasortat tamarmik taamatut sunniiniaqataasut.

Inussiarnersumik

Naaja H. Nathanielsen
Inuit Ataqatigiit Inatsisartuni ilaasortaaq