Inatsisartut sattallutik sulisinneqassanngillat

Inuit Ataqatigiit Inatsisartunut ilaasortaatitaattut piffisami kingullermi mittarfinnik sanaartornissamut suliap ingerlanneqarnera naammaginanngitsutut isigaarput.

Suliap killifianik annertuumik nikeriaqattaartoqarpoq taamattorli Inatsisartut, suliami uani qitiusumik akisussaaqataasut ukiunilu tullerni Aningaasanut Inatsit aqqutigalugu aningaasalersuinermut qulakkeerinnittartussat sallersaat killiffiusunik ilisimatinneqassanatik. Naak Naalakkersuisut ersarilluinnartumik mittarfiit pillugit suliap ingerlanerani Inatsisartut Aningaasaqarnermut Akileraartarnermullu Ataatsimitsitaliaat aqqutigalugu Inatsisartut ilisimatittarniarlugit neriorsuutigisimagaluaraat. Ataatsimitsitaliap matoqqasumik sulinera saqqummiutinngikkaluarlugu ilisimatitsisoqartarsimanngitsoq uppernarsarusuppara. Tamanna Ataatsimiitsitaliap suleriaasa malillugu nammineq oqaatigisimasama avammut oqaatigisinnaanerannik illersorneqarsinnaammat.

Mittarfissat pillugit suliap sapinngisamik pitsaanerpaamik, inuiaqatigiinnut sunniuteqarnerlunngitsumik isumatusaartumillu naammassinissaat suleqataaffiginiaraluarlugu, Naalakkersuisunit ikinnerussuteqartunit kisermaaserpalaartumik suleriaaserineqartoq attanneqaannassappat suliap unitsikkallarneqarnissaa kissaatigaarput. Soorunami nunatta aningaasaataanik atuilluni sanaartortitsinerit Inatsisartut ilisimasariaqarmassuk, taamaalillunilu inatsisit malitassat malillugit sulisoqarnersoq qulakkeerinneqataallutik. Tamannalu ullumikkut piunngilaq naak Naalakkersuisut killormuuanik neriorsuuteqarnikuugaluartut. Toqqortugassaqanngippat tatigeqatigiilluni suleqatigiinnissaq orniginarnerummat kissaatigaarput ilisimatinneqassalluta. Qularinngilarpullu aamma Inatsisartuni ilaasortat partiillu tamarmik soqutigissagaat suliap killiffianik ilisimasaqassallutik.

Inussiarnersumik

Múte B. Egede

Inuit Ataqatigiit siulittaasuat.