Nassuerutigisariaqarpara, qaammatini kingullerni nunatsinni politikkikkut ingerlatsineq politikeriulluni naammaannakujussimammat. Nuanninngitsunik pitsaasunillu pisoqartarsimavoq, nunaniitsulli amerlanerullutik. Kisianni pitsaasortai siulliuteriarlakka:

Nuummi inuit amerlaqisut Inatsisartut ataatsimiittarfissaata Aqqaluup aneerasaartarfianiinnissanut isumaqataanatik akerliunertik takutitsippaat, tamatumallu kingorna Naalakkersuisunut ima sakkortutigisumik akerliussutsimik takutitsillutik, allaat Naalakkersuisut iluminni avissaartuullutik, nutaamillu qinersisoqarnissaa nalunaarutigineqarluni, tamannalu takussutissaavoq inuit tamat oqartussaanerata – killissaq tikkineqaraangat – atuunneranut. Tamanna pivoq qaammatini kingullerni 18-ini ingerlanerliortoqarlunilu, kusanaatsuliornerpassuit pereersullu.

Benjamiimut Sakæusimut, sinerissamilu innuttaasunut Naalakkersuisut uppinnerat, aammalu uppinnissaasa tungaanut ingerlanerat, ungasissutut, tupinnartutullu misiginarsimassaaq. Kanngusuusaarnaqaarlumi.

Politikeritut sallugutta, karsimilluunniit aningaasanik tigusilluta – imaluunniit taakku tamaasa – inuiaqatigiit politikkimut, politikerinullu isiginninnerat innarlissavarput. Naggataatigut inuit eqqarsarluarsinnaasut pisortani, Namminersorlutik Oqartussani kommuniniluunniit suliffissarsiornissartik ornigiunnaassavaat. Nunatsinni pikkorinnerit, ingammik inuusunnerusut, maanna nunanut allanut qimarrallutik suliffissarsiortalereerput. Taamatumani namminersorluni inuussutissarsiuteqarneq eqqorneqarpoq, tassanilu inuiaqatigiit ineriartornissaannut isumassarsiat nutaat pilertaraluarput. Uagullu politikerit ineriartornermut pitsaanngitsumut akisussaanerpaavugut.

Pisariaqarpoq politikerit imminnut qiviarluta aperinissarput, sooq inuiaqatigiinni pissaaneq oqartussaaqataanerlu kissaatigisimaneripput. Uagut nammineq, qanigisagullu pisuunngortinniarlugit? Politikeriuneq inuussutissarsiutigiumallugu? Imaluunniit allannguinernik, pitsanngorsaanernillu oqimaatsunik pisarialinnilli, inuiaqatigiinnut tamanut iluaqutaasussanik iliuuseqarniarluta?

Uanga isumaga – Inuit Ataqatigiillu isumaat – tassavoq politikkikkut pissaanermik tigumminninnerup atugaannaasarnera. Tigummineralu killissaqartoq. Ullut ilaanni allanit ingerlatitseqqittussanit tiguneqartussaavoq, taakkulu inuiaqatigiinni pitsanngorsaanerit ingerlateqqittussaavaat. Nunatsinnili politikkikkut suliaqartut akornanni qimerluuininni, takusinnaavara taama isumallit amerlavallaanngitsut. Eqqortorli unaavoq iliuutsigut pillugit eqqartuunneqartussaavugut. Ingerlaavartumik, ullut naggatissaat tikillugu. Ullorlu taanna qaquguussanersoq qinersisartut aalajangertussaavaat.

Politikeritut akueralugulu takusariaqarparput, inuiaqatigiit akornanni pissutsinut siuttuusussaagatta, ingerlatsinitsinnilu pingaartillugit aallaavigissagatsigit naligiinneq, ataqatigiinneq, namminersornerlu. Pingaartitagut sumiginnarutsigit, uatsinnuinnaq sumiginnarata aamma nunarput sumiginnassavarput.

Nunatta qanoq sullissinnaaneraatigut apeqqutigiunnaartariaqarparput. Illuatungaanili aperisariaqarpugut, uagut nammineq nunarput qanoq sullissinnaanerlugu! Tamanna tamatsinnut atuuppoq.

 

Inuulluaqqusillunga

Allan Pertti Frandsen, Inuit Ataqatigiit

Kommunalbestyrelse-ut ilaasortaq, Kommuneqarfik Sermersooq

Mobil +299 598755, apfr@sermersooq.gl, www.facebook.com/ia.pertti