Inuit Ataqatigiit Air Greenland-mut piginnittunut iluanaarutit akiliutigineqarnerannik nutaarsiassaq tupigusuutiginngitsoorsimanngilarput. Naatsorsuutigilluinnarparput Namminersorlutik Oqartussat pingajorarterummik piginneqataasutut piginneqataasut akornanni qanoq isumaqarnerlutik nalunaarutigisimassagaat. Inuiaqatigiinnut ammasumik qanoq inissisimasimanerlutik Naalakkersuisut nassuiaanissaat suli amigaatigaarput.

Isumaqarluinnarpugut taama annertutigisumik iluanaarutisiaqarneq Nunatta innuttaaasuinut Air Greenlandimullu maani Nunatsinni atuisuusunut iluaqutaasumik kinguneqartinneqartariaqarmat. Innuttaasut akornanni akikinnerusunik billetsisinnaanermik kissaateqarneq tusaavarput, aamma kiffartuussinissamik isumaqatigiissuteqarfiusuni. Sinneqartoorutip taama annertutigisup billetsinut akikinnerusunut sooq atorneqarsinnaannginnerannik apeqqusiisunut tupigusoqataavugut. Ingerlatseqatigiiffimmi ukiumit ukiumut sinneqartoorutit taama annertutigisartillugit akikinnerusumik angalasinnaanissamut kinguneqartumik iliuuseqartoqarsinnaasimassaaq.

Oqallinnermut malinnaanitsinni aamma maluginngitsoorsimanngilarput Naalagaaffiup SAS-llu sinneqartooruteqarnermit pingajorarterutinik marlunnik iluanaartussanngornerat ilaannit mamiagineqarmat. Piginneqataasut iluanaarutisiarsisarnerat eqqumiigisassaanngilaq. Uagulli kissaatigaarput Namminersorlutik Oqartussat iluanaarutisiaat piginneqataanerulernissamut atorneqassasut, ingerlatseqatigiiffimmut Nunatta annertunerusumik piginneqataaffeqarnissaa anguniarlugu. Inuiaqatigiittummi SAS-p Naalagaaffiullu iluanaaruteqartarnissaat nuannarinngikkutsigu nammineq piginneqataasuunerput annertusartariaqarparput.

Aalajangiinermi qanoq periuseqartoqarsimanera sunalu siunertaralugu taama iliorsimanermut tunngaviusut ammanerusumik paasisaqarfiginissaat kissaatigaarput. Inuit Ataqatigiit erseqqissumik oqaatigissavarput Naalakkersuisut suliami qanoq kissaateqarsimanerat qanorlu anguniagaqarsimanerat inuiaqatigiit ammasumik ilisimatinneqartariaqarmata.

Ukiortaami oqaaseqaatitsinnut innersuussiumavugut, tassani Nunatta piginneqataaffigisaanut ingerlatseqatigiiffinnut mianersortumik periuseqarnissaq piumasarigatsigu, inuiaqatigiinnullu ajunnginnerpaamik inissisimanissaat innuttaasunullu iluaqutaasumik ingerlanissaat piumasarisat pingaarnersarisariaqaraat oqaatigalutigu. Assersuutigalugu maannakkut Air Greenland-p aalajangersimasumik sinneqartooruteqarnissaanik piumasaqartarpugut. Piginnittutut imminut akilersinnaasumik ingerlatseqatigiiffiit ingerlanissaannik piumasaqarneq immaqa naammassagaluarpoq.

Qanorluunniit pisoqarpat Namminersorlutik Oqartussat iluanaarutisiaqarnissamut suliami qanoq iliuuseqarsimanersut Naalakkersuisunit erseqqissumik tusagaqarnissaq utaqqivarput, aamma utaqqivarput Naalakkersuisut aningaasat sumut atorneqarnissaannik siunertaqarnersut tusassallugu.

Sara Olsvig

Siulittaasoq, Inuit Ataqatigiit