Benzinasiutissaq pillugu suliap takutippaa partiit marluusugut, tassalu Inuit Ataqatigiit taavalu Siumut aqutseriaatsikkut pingaartitatta qanoq assigiinngitsiginerat.

Naalakkeersuisut siulittaasuata Kim Kielsenip Naalakkersuisup tunuarnerata kingorna illuatungiliuttut qisuariaatigisaannut pakatsinerminik oqariartornermini ersarilluinnartumik naliliisinnaassutsimigullu qanoq inissisimini takutippaa, tamannalu ajusaarnaraluartumik Kim Kielsenip aqutseriaasianut ilisarnaatinngorsimasutut taasariaqarluni. Kim Kielsenip pakatsissutigisussaagaluarpaa politikerertaqarattaasit nammineq Nunattalu Karsiata aningaasaataannik immikkoortitsisinnanngitsumik.

Inuit Ataqatigiit suliap ingerlanerani orsussamik akiliutissamik atornerluisimanerup naliginnaasuunnginnera Naalakkersuisunullu tatiginnilluni akiliutissamik peqartitsinermut naapertuutinngitsoq ingerlaannaq takusinnaasimavarput.

Inuit Ataqatigiunngilaq suliaq sivitsorsarlugu sulisimasut aamma uaguunngilaq taamani Naalakkersooqatigiiusimasuni naammaginanngitsumik nipangersimasussaatitaanermillu meqqilersukkamik paasissutissiisimasut innuuttaasunut paasissutissiisinnaannginnermik kingunilimmik. Kim Kielsen-illiuna aalajagingaa soorlu aamma Kim Kielsenip aalajagingarigaa marloriarluni Doris J. Jensen Naalakkersuisunngortissallugu naak nalunngikkaluarlugu atornerluinermik suliamik Inatsisartut Kukkunersiuinermut Ataatsimiititaliaanit Nunatta Karsianut Naatsorsuutit 2017-moortut suliarineqalerpata oqaaseqateqartussanngulernerani tatiginnikkunnaarnermik taasititsisoqarsinnaaneranik kinguneqariaannaasumik sulisoqartoqariaannaasoq.

Inatsisartutut qinikkatullu paasissutissat §37 aqqutigalugu saqqummiunneqartut aallaavigalugit Deloittellu nalunaarutaata tusagassiorfitsigut saqqummerneratigut qisuariarnikkut suliassarput suliaraarput. Taamani Naalakkersuisuusimasunut paasissutissiissutigineqartut Deloittep nalunaarutaatut imartutiginngillat. Ilimagisimavarput suliaq taamatut imaqariaannaasoq kisianni Kukkunersiuinermut Ataatsimiititalip suliaat sakkortusisamik nipangersimasussaatitaanermik piumasaqaatitaqarmata imarisaanut tunngatillugu paasitinneqarsinnaasimanngilagut.

Deloittep nalunaarusiaat quppernernik sisamanik annertussusillip Inuit Ataqatigiit Doris J. Jensenip Naalakkersuisutut biilit orsernerannut akiliissutigisinnaasaanik korteqartitaanermini illersorneqarsinnaanngitsumik atuisoqartarsimaneranik paasissutissiinera naliliinitsinnut aallaaviulluinnarsimavoq. Taamaammat pingasunngornermi nalunaaruteqarpugut Naalakkersuisutut tatigisinnaajunnaaratsigu.

Kim Kielseni 2017-imili taamatut naliliisinnaasimagaluarpoq.

Naliisinnaassuseqarnermut piginnaassusakinneq innuttaasullu tatiginninnerannik ataqqinninnginneq pissutaaqataavoq Inuit Ataqatigiit Siumumik naalakkersuisooqateqaleqqikkusunngikkallarnitsinnut.

Illuatungiliuttut pakatsissutiginagit nammineq iliuutsini pakatsissutigissagaluarpai.

Maanna inernerilerpaa inuiaqatigiinni akisussaaffiit akisunerpaat annertunerpaallu Naalakkersuisut akunnerminni agguaateqqittussanngormatigit tamannaluaasit innuttaasut inuiaqatigiillu aningaasartuutissaat annertussaqaaq.

Tamanna naammaginanngilluinnarpoq.

Inuit Ataqatigiit uangalu suliamut matumunnga oqaaseqaqqinnissarput kissaatiginngilarput. Politikkikkut suliassatsinnut saaqqittariaqarpugut. Avaqqutaarinninnerit naammaleqaat. Nunatsinni suliassat unammillernartut aaqqiivigineqarnissaat saattariaqarpavut politikkikkut ajornartorsiutit nammineq pilersissimasat qimallugit.

Sara Olsvig
Siulittaasoq, Inuit Ataqatigiit