Matumuuna partiit naalakkersuisooqatigiinnut illua-tungiliuttuusugut naalakkersuinikkut pisunut naammaginnikkunnaarluta tusagassiorfitsigut nalunaaruteqarpugut. Inuit Ataqatigiit, Parti Naleraq, Demokraatit aammalu Parti Inuit isumaqarpugut naalakkersuisooqatigiit iluminni avissaartuunnerat ataatsimoorfeqaratillu sangujoraartumik aqutsiniarnerat naammalersoq.

Nunarput inuiaqatigiillu kalaallit Naalakkersuisunut ilaasortanit ataasiakkaanit aqunneqarsinnaanngillat.

Naalakkersuinikkut massakkut pisut Nunatta inissisimaneranut assorujussuaq ilungersunarput. Tusagassiorfitsigut tusarparput takullugillu Inatsisartunut ilaasortat Siumumeersut marluk 2015-mut aningaasanut inatsisissamut akerliullutik taasiniartut.

Tupinnarneruvorlu Aalisarnermut Naalakkersuisoq aalisakkanut akitsuusersuinissamut Aningaasaqarnermut Naalakkersuisup saqqummiussaanut akerliulluni oqarmat ilanngullugulu aalisartut aallerfigineqarnissaannik aningaasanut inatsit siunertaqanngitsoq aamma taamatut aalajangiisoqarnikuunngitsoq, suleqatigiissitarlu aalisarnermut tunngasunik sulialik aallartinneqarsimasoq ilisimanagu oqarluni. Naalakkersuisoq susassaqarfimminut akisussaassuseqartoq taama ilisimasaqanngitsigisumik inuiaqatigiinnut oqaaseqarsinnaanngilaq.

Pisut nangiinnarlugit Peqqissutsimut Naalakkersuisoq aamma kommunit akornanni naligiissaarinermut akiliinissaannut Naalakkersuisunit aalajangiunneqarsimasumut akerliulluni oqaaseqarpoq. Naalakkersuisooqatigiinni ataatsimoortoqanngittoq maanna erseqqilluinnarpoq. Kikkut tamarmik tusaasinnaasaannik avissaartuunneq akerleriinnerlu naalakkersuisooqatigiit ilisarnaasiuppaat. Nunarput inuiaqatigiiusugullu taamatut aqunneqarsinnaanngilagut.

Naalakkersuisooqatigiit tunuliaqutaqanngillat. Pisariaqarluinnalerpoq eqqortumik akisussaassuseqartumillu nunatta aqunneqarnissaa. Inatsisartut immikkut ataatsimiigiaqquneqarnissaat qinnutigisariaqarparput, Naalakkersuisullu Siulittaasuat qinersinissamik nalunaaruteqartariaqarpoq akisussaaffini naapertorlugit nunatta iluamik patajaatsumillu aqunneqarnissaa timitalerumallugu.

Ataani partiit illua-tungiliuttut taamatut atsiorluta Naalakkersuisooqatigiit aqutsinerlunnerat naammagalugu sakkortuumik akisussaasunut nalunaarut matuuna apuupparput.

Sara Olsvig, Inuit Ataqatigiit
Hans Enoksen, Partii Naleraq
Andreas Uldum, Demokraatit
Nikku Olsen, Partii Inuit