Ilinniakkanik aaqqissuussinermi Naalakkersuisut akulerunnissaat akuerinngilarput

Ilisimatusarfik pillugu Inatsisartut aammalu  Qaffasinnerusumik Ilinniartitaanerit pillugit Inatsisartut inatsisaat inatsisartuni oqaluuserineqarmat Inuit Ataqatigiit Ilinniakkanik aaqqissussinermi Naalakkersuisut akuersisalernissaat akerlilerparput.

Ilisimatusarfimmi rektori Gitte Adler Reimer naalakkersuinikkut Ilisimatusarnermut akuleruttoqarsinnaaneranut ernumalluni oqaaseqarnera isumaqatigaarput. Ilisimavarput Ilisimatusarfimmi immikkut piginnaasalinnik Ilinniagartuut Siunnersuisoqatigiffeqartoq aammalu Ilisimatusarfimmi ilinniakkanik aaqqissuussinerit nalilernissaannut pitsaasusaasalu qulakkeernissaannut immikkut ilinniarsimasunik peqartoq, taakkulu Naalakkersuisunit suliaminnut ilisimaarinninnermikkut naliliisinnaanerusutut isigaavut.

Soorlu oqaaseqaatitsinni ima oqartugut: “Pingaaruteqarluinnarpoq Ilisimatusarfiup nunani allani ilisimatusarfinnut nallersuunneqarsinnaanissaa, taamaammat  Ilisimatusarfiup anguniagai, piumasaqaatai aqunneqarneralu nunani allani piumasaqaatinut qaninnerpaamiissapput. Taamaapputtaaq Politikkikkut aqunneqarsinnaaneq. Naalakkersuisut siunnersuutigaat Ilisimatusarfiup anguniagaasa Naalakkersuisunit akuerineqartarnissaa. Tamanna mianersuuteqquarput. Pingaaruteqarluinnarpoq Ilisimatusarfik politikkikkut naalakkersorneqartutut pasillerneqannginnissaa, ingammik nunanit allaniit nalornisoqassanngilaq Ilisimatusarfik politikkikkut aqunneqanngitsoq naalakkersorneqanngitsorlu.”

Pingaaruteqarluinnarpoq Ilisimatusarfik ilinniakkanik aaqqissuussinermi Naalakkersuisunit akuliuffigineqannginnissaa. Sumi allani nunani Naalakkersuisut Ilisimatusarfimminnut akuliuttaramik?

Inuiaqatigiit eriagilluinnagassarput tassa: Ilisimatusarneq politikkikkut aqunneqassanngilaq. Ilisimatusarneq kiffaanngissusermik ingerlanneqassaaq.

 

Mimi Karlsen, Inuit Ataqatigiit
Tlf 587619