Allattut Iddimanngiiu Bianco aamma Allan Pertti Frandsen, Inuit Ataqatigiit sinnerlugit Kommuneqarfik Sermersuumi kommunalbestyrelsimi ilaasortat.

 Qaasuitsup Kommuniani Viceborgmesteri Jess Svane, tallimanngorneq 8. august 2014 www.knr.gl-ikkut oqaaseqarpoq, kissaatigigini torersumik piviusumillu oqallittoqarnissaa. Qaasuitsup viceborgmesteria tamatumani isumaqatigiinnarsinnaavarput.

Kisianni Jess Svane ilanngussami tassani ima oqaaseqarsimasutut issuarneqarpoq
Kommuneqarfik Sermersuumi qinikkat naligiissaarinermut periusissaq pillugu innuttaasunut saqqummeqattaarnerat torinnginnerarlugu kanngunarneralugulu uparuarpai.” Jess Svane-llu Sermersuumi innuttaasunut qinikkanullu suna kanngunarnerarnerlugu, ima nassuiarpaa:
Meeqqat, inuusuttut utoqqaallu naligiissaarinerup kingunerisaanik atugaasa ajornerulernissaannik oqaluunnerisigut allaanngilaq sallunaveeqqutitut atorniarneqartut” Jess Svane KNR-imut, 8. august 2014 ilanngunneqartumut oqarpoq.

Ila, Jess Svane-aa. Kisitsisinik piviusunik saqqummiussineq tassaanngilaq, sallunaveeqqutitut tigusineq. Kisiannili tassaalluni mianersoqqusineq. Piffissaagallartillugu!

Kangianiit mamiasuutigaarput Kommuneqarfik Sermersuup kommunitut pisuutut taakkartorneqarnera. Kikkut tamarmik nalunngilaat Kangianut annertuumik aningaasaliisoqarnissaa pisariaqartinneqartoq, sunulluunniit tunngagaluarpata, inuussutissarsiornermut, isumaginninnermut, imaluunniit ineqarnermut. Naalakkersuisut siunnersuutaattut, kommunimut aningaasaliissutinik equngasumik agguaassisoqassappat, tamanna Kalaallit Nunaata Kangiani innuttaasut siulliullutik malugisussaavaat. Aammalumi Kommuneqarfik Sermersuumi innuttaasut allat malugisussaallugu.

Taamaammat Sermersuumi kommunalbestyrelsimi ilaasortat 17. juli – ataatsimiinnermini partiit Atassut, Demokratit, Inuit Ataqatigiit, aamma Jess Svanep nammineq partiia, Siumut, politikkikkut akisussaassuseqarlutik – Naalakkersuisut naligiissaarinermut siunnersuutaat nutaaq akuerinngilaat.

Tassalu oqallinnermi – ilaatigut innuttaasut ataatsimiisinneqarnerini pingasunngornermi 6. august 2014-imi saqqummiussatsinni – kommuninut naligiissaarinermut IMMIKKUT 56 million kr.-inik qaffaaniarneq, Sermersuumi innuttaasut atugaasa ajorseriangaatsiarnissaannik oqalunnerput eqqortuuvoq.

ASSERSUUTIGALUGU, 56 million kr.-inik sipaarfigisinnaasagut suusinnaappat, assersuutitut:
• Sunngiffimmipaaqqinniffinnullu neqeroorutit 4. Klasse-niit qummut: 24 mio. kr.
• Meeqqat atuarfiini sullissinerup annikkillisaaviginera, inatsisit minnerpaaffigititaat atulerlugit: 21 mio. kr.
• Ilaqutariit ornittagaat, pinaveersaartitsinermillu suliniarfiit matullugit: 11 mio. kr.

Taakku ASSERSUUTAAPPUT qanoq Sermersooq aningaasartuuteqarfiusuni annerni 56 million kr.-inik sipaarsinnaanersoq. Kisianni meeqqat atuarfiat, isumaginninnermullu tunngasut taakkuupput kommunip ingerlanneqarnerani aningaasartuutaanerpaanut ilaasartut. Tamannalu iluarineqassanngeqaaq – inuiaqatigiinnullu pitsaasuussanani.

ASSERSUUT ALLA tassaavoq, Sermersuup sulisut 160-it soraarsippagit. Kisitsisit ajoraluartumik annikinaagaapput. Kommuneqarfik Sermersuup sulisuni 160-it soraarsissappagit, tamanna akileraarutinit isertassanik annaasaqarfiussaaq, soraarsitallu suliffeqanngitsutut ikiuutinik tunineqartariaqassallutik. Taamaammat kisitsisit eqqornerusut tassaagunarput soraarsitat 300-it missaat!

Sermersuumi upperaarput atorusullugulu ammasuuneq, innuttaasunillu peqataatitsineq. Taamaattumillu arlaannik ajortoqalerpat oqaatigisariaqarparput. Matumanilu pissutsit piviusut oqaluttuaraagut. IMMIKKUT 56 million kr.-it Sermersuup aningaasaqarneranut aarlerinartuupput. Sermersooq aningaasatigut ajalusuussappat, nunarput tamarmi eqqorneqartussaavoq. Sermersuumiit kissaatigaarput, naligiisitsiniarnerup piffissaq ungasissoq isigalugu iluarsii-viginiarnissaa. Aaqqiissutissamik nassaartoqartariaqarpoq. Naalakkersuisut, kommunillu ataqqeqatigiillutik oqaloqatigiinnerisigut.

Inuulluaqqusilluta

Iddimanngiiu Bianco, Inuit Ataqatigiit, kommunalbestyrelsemut ilaasortaq, Kommuneqarfik Sermersooq, mobil +299 548844, itbi@sermersooq.gl

Allan Pertti Frandsen, Inuit Ataqatigiit, kommunalbestyrelsemut ilaasortaq, Kommuneqarfik Sermersooq, mobil +299 598755, apfr@sermersooq.gl, www.facebook.com/ia.pertti