Allattoq: Aqqaluaq B. Egede, siulittaasup tullia, politikkikkut oqaaseqartoq

Ikanngilagut: Ineqarnermut Attaveqaqatigiinnermullu Naalakkersuisoq akisussaatinneqarli

Ineqarnermut Attaveqatigiinnermullu Naalakkersuisoq ataasiaannarani imminut assortuuttunik nalunaaruteqartarpoq. Tusagassiorfitsigut saqqummiussat, naalakkersuinikkullu Inatsisartunut saqqummiussat eqqunngitsut sulinitsinnut aalajangersaaniarnitsinnullu nalornilersitsisut tulleriiaaginnavipput. Naak Naalakkersuisut suleriaasianni inatsisit malitassat ersarilluinnartut eqqunngitsumik paasinerluutaasinnaasunillu Naalakkersuisut sulisussaannginnerat aalajangersakkanik malitassaqaraluartut.

Naalakkersuisuuneq akisussaaffimmik annertuumik pisussaaffiliisuuvoq, malitassat malinneqartariaqarput. Demokraatit, Siumut aamma Nunatta Qitornai Atassullu Ineqarnermut Naalakkersuisup eqqunngitsunik nalunaaqataarnera paatsuungatitseqattaarneralu isiginngitsuusaarpaat.

Tassami Naalakkersuisoq annertuunik ingasaginartunik imminut assortuuttunik nalunaaqataartoq minnerpaamilluunniit qisuariarfigineq ajorpaat. Naalakkersuinikkut imminut illersorsinnaasumik aqutsineq pingaartinneqanngilaq. Pingaartinneqarsimasuuppat suleqataasut tamarmik iliuuseqarsimanissaat takoreersimassagaluarparput.

Naalakkersuisup eqqunngitsumik nalunaaqattaarnera ingerlatseqatigiiffinnut, kattuffinnut, ilami inuiaqatigiinnut naalakkersuinikkullu suliaqartunut tamanut aalassatsitseqattaarpoq. Akisussaaqatigiilluni naalakkersuisooqatigiinneq pisimasuuppat tunuliaqutaasut tamarmik qisuariarsimanissaat pisimassagaluartoq qularnanngilaq.

Naalakkersuisooqatigiinni qulaaniit aqutsineq, Inatsisartuutitallu maleruutiinnarumatussusiat Naalakkersuisut qanorluunniit pissusilersorlutik sulisinnaatitaanerannut ersiutaapput nunatsinnut peqqinnanngitsumik.

Ineqarnermut Attaveqatigiinnermullu Naalakkersuisoq suliassaqarfimminut annerertoqisumut akisussaaffeqarnissaminut pitsaasumik naammassinnissinnaanngippat tunuartariaqarpoq. Akisussaaffik annertooq naammattumik pitsaassusilimmik nakkutigineqanngippat inuiaqatigiinnut pitsaanngitsumik sunniuteqalereersoq suli ajornerusumik sunniuteqassaaq.

Pisut uppernarsaatigisinnaavagut kukkunerit eqqunngitsuliornerillu pisut kingulliunavianngitsut. Naalakkersuisnut ilaasortat misilittakkamikkut naammattunik misilittagaqanngitsut akisussaafferujussuarmik tigusaminnut artorsartut inuit malinnaasut paasereerpaat.

Pissutsit taamaattut qaangiataaginnarneqarsinnaanngillat. Eqqunngitsuliornerit akisussaaffigineqartariaqarput Naalakkersuisumit pineqartumiit, kisianni aamma Siumup aamma Inatsisartunut ilaasortaatitai pisussaapput akisussaaffitsik qanoq ittuusoq paasisimallugu iliuuseqarnissaminnut.

Naalakkersuisoq artorsartoq, kukkoqattaartoq eqqunngitsunik imminullu assortuuttunik nalunaaqattaartoq Isiginngitsuusaarneqarpoq. Qinikkat naalakkersuisunut tunuliaqutaasut Demokraatineersut, Siumumeersut aamma Nunatta Qitornaasa Inatsisartuutitaasa akisussaaqataasutut nipangiinnarlutik iliuuseqarnaveersaarnerat inuiaqatigiit nunatsinniittut tamarmik ingerlanerliorneq ”akilersorpaat”.

Nunarput inuilu tamanit qullerpaajupput. Eqqortumik sangujoraartuunngitsumillu siulersorneqartariaqarput. Naalakkersuisooqatigiit suleqataasalu parteertik kisiat annanniarsaralunikku nunarput inuilu naalakkersuinikkut siulersorluarneqarnissaat pilliutigisaqattaaginnarsinnaanngilaat. Ilumut, nunarput ineqarnermut, attaveqatigiinnermut ineriartornermullu tunngasutigut inuit ulluinnarni toqqaannartumik atugaannut sunniutilippassuit Naalakkersuisup pineqartup akisussaaffigai.

Naalakkersuisuuneq asuli tunissutisiatut atuuffigineqarsinnaanngilaq suliassaqarfik annertoqaaq. Nunap inuinut toqqaannartumik sunniuteqarfiuvoq peqqissaarunneqartariaqarporlu. Imminut illersorsinnaassuseqartumik Naalakkersuisumik akisussaasoqarnissaa pisariaqarpoq. Inuit nunattalu kukkusumik siulersorneqannginnissaat qulakkeerneqartariaqarpoq.

Tamanna suleqatigiit nipaaqisut Naalakkersuisunut tunuliaqutaasut akisussaaqataaffigaat iliuuseqartoqartariaqarpoq. Naalakkersuisut Siulittaasuata pisussaaffini naammassisinnaanngippagu, aamma Inatsisartunut ilaasortaatitaasa akisussaaffik tigusinnaanngippassuk, malitassat malillugit aqutsisoqarnissaa siunertaralugu Inuit Ataqatigiit iliuuseqassaagut.

Uppernnarsisariaqarparput ilumut naalakkersuisooqatigiit suna tamaat akigalugu toqqorteriinnarlutik ingerlatsinissartik toqqarneraat, imaluunniik akisussaaffik tigullugu Ineqarnermut Attaveqarnermullu Naalakkersuisoq akisussaatissaneraat.