SAS-p naalagaaffiullu Namminersorlutik Oqartussat peqatigalugit Nunatsinni timmisartuutileqatigiiffik, Air Greenland, piginneqatigiiffigaat. Tamanna naleqqutinngilaq. Piffissamimi sivitsortumi piginneqataasut pingasuusut ingerlatseqatigiiffiup qanoq ineriartortinnissaanut assigiinngippallaartunik takorluugaqarput. Piffissanngorpoq timmisartuussinermi unammilleqatigiinnermi sakkortusiartuinnartussami nukittunerpaamik inissisimajumalluta Air Greenland tamakkiisumik nammineq pigilissallugu.

Nunarput angallannikkut unamminarluinnartumik inissisimavoq. Innuttaasut amerlavallaarujussuartut angallannikkut naammaginanngilluinnartunik atugaqarput. Ukiumit ukiumut kiffartuussinissamut isumaqatigiissutinik kiffartuussinikkut akitigullu naammaginanngilluinnartut isumalluutigiuarpagut.

Tamatuma saniatigut piffissaq aggersoq takornariaqarnikkut siuariartorfiusussaq, inuussutissarsiornikkut angallannermik pisariaqartitsiffiusussaq avataaniillu angallassinikkut unammillerneqarfiusussaq ilisimaaraarput.

Inuiaqatigiit timmisartuutileqatigiiffik pigisarput nuna tamakkerlugu angallassinermi pingaaruteqarluinnartumik inissisimavoq. Ingerlatseqatigiiffik inuiaqatigiit ingerlanerannut qitiulluinnarpoq. Tamanna eriagissavarput. Inuiaqatigiittut Air Greenlandip qanoq ittunik qulimiguulinnik timmisartunillu peqarnissaanut aalajangiisuunerusariaqarpugut.

Pissutsimmi ullumikkutut ittut atuutsillugit piginneqataasut pingasuusut assigiinngitsunik siunertaqarnertik pissutigalugu timmisartunik qulimiguulinnillu pisariaqartinneqartunut aningaasalersuinissamut ataatsimoorfeqarsinnaannginnerat ilisimavarput. Tamanna Inuit Ataqatigiinniit allanngortikkumavarput.

Ingerlanneqarnera niuernermik tunngaveqassaaq

Siunnersuutigaarput SAS-p naalagaaffiullu Air Greenlandimi piginneqataassutaat Nunatta pisiarissagai, ingerlatseqatigiiffik tamakkiisumik inuiaqatigiinnit kalaallinit pigineqartunngorlugu. Ilanngullugu oqaatigiumavarput unammilleqatigiinnerulernissaq tikilluaqqugatsigu qulakkeerumallugulu Air Greenland kalaallinit tamakkiisumik pigineqartoq niuernermik tunngaveqartumik ingerlassammat suliffeqarfillu Naalakkersuinikkut toqqaannartumik sunnerneqarani suli ingerlanneqassammat.

Nunatsinni timmisartuussinikkut ingerlatseqatigiiffik annerpaaq namminerisamik aqulernissaa isumannaassallugu pingaarnerpaavoq, taamaalilluta Nunatsinni pingaartitagut allaavigalugit suliffeqarfiup pingaarnersiuinera pisinnaassammat. Suliffeqarfiup qulimiguulinnik timmisartunillu nutaanik aningaasaliinissaa pingaarnerutittariaqarparput, piginnittunut iluanaarutit agguaanneqarnissaat salliutinnagu.

Ingammik mittarfeqarneq pillugu aalajangersaanissat imaannaanngitsut eqqarsaatigalugit pitsaanerpaamik inissisimanissarput qulakkeertariaqarparput. Timmisartuutileqatigiiffitta innuttaasut inuiaqatigiillu kalaallit pisariaqartitaat salliutilluinnarlugit ingerlanneqarnissaa pillugu pitsaanerpaamik aqussinnaasariaqarparput.

Air Greenland inuiaqatigiinnit 100 %-mik pigineqartoq nukittuumik inississavaatigut.

Unammilleqatigiinnermi aggersussami nukittunerpaamik inissisimatissavaatigut. Ineriartortitsinissamut periarfissanik atuilluarsinnaanitta qaffasinnerpaaffimmimnnissaannik qulakkeerinnissaaq – innuttaasut tamarmik nunalu tamakkerlugu angallanneq pillugu.

Aqqaluaq B. Egede, Siulittaasup tullia, Inuit Ataqatigiit