Nukissiutit avatangiisinut mingutsitsinngitsut soorlu erngup, anorip, seqernullu nukingi Nunatsinni naalakkersuinikkut pingaartinneqarnerullutillu salliutinneqartariaqaraluarput. Avatangiisinut mingutsitsinngitsunik nukissiuutinik pilersugaanissaq kiisalu uuliamik isumalluuteqarnerup annikillisarnissaanut Naalakkersuisooqatigiit suliniuteqarnerunissaat kaammattuutigaarput.
Siumut, Inuit Ataqatigiit, Partii Naleraq Naalakkersuisooqatigiikkallarmata Naalakkersuisooqatigiinnissamut isumaqatigiissutaanni ilaatigut illoqarfinni tallimani erngup nukinganik nukissiorfinnik pilersitsinissamut aallarnisaasoqassasoq erseqqissumik ima allassimasoqarpoq:

“Aasianni, Qasigiannguani, Maniitsumi, Paamiuni kiisalu Nanortalimmi erngup nukinganik nukissiorfinnik pilersitsinissaq aallartisarneqassaaq.

Naalakkersuisooqatigiit isumaqatigiissutaat

Maannakkut Naalakkersuisooqatigiit Siumut, Parti Naleraq, Nunatta Qitornai, Atassut naalakkersuisooqatigiinnissamut isumaqatigiissutaannit illoqarfinni tallimani erngup nukinganik nukissiorfinnik aallarnisaasoqarniarnerannut pilersaartoqannginnera uggornarpoq paasiuminaallunilu. Maannakkut Naalakkersuisooqatigiit Qeqertarsuup Avannaatungaani Nuussuarmi uuliamik misissuinissamut 48 mio. koruunit aningaasaliissutigaat. Uuliasiornissamut pilersaarutit ersarlupput, siunissamullu ungasinnerusumut pilersaarusiornerlunnertut oqaatigisariaqarluni. Uuliasiornissamut pilersaarutit ersarlutsillugit piffissami aggersumi uppernarsillugu uuliamik nassaartoqarnissaa qularnartutut oqaatigisariaqarpoq. Taamaattumik Naalakkersuisooqatigiit uuliasiornissamut 48 mio. koruuninit aningaasaliisimanerat pissusissamisuunngitsutut oqaatigisariaqarpoq.

Uuliamik misissuiffiulersussaq Qeqertarsuup Avannaatungaani Nuussuarmiippoq. Uuliaqarneranik misissuinermi sajuppillatsitsisarluni misissuisoqassaaq. Nuussuaq tuttoqarfiuvoq. Sajuppillatsitsisarluni misissuinermi tuttut piniaruminaallisinnaanerat piniartunut eqquinerlussinnaanera aarleqqutigineqarsinnaavoq.

Uuliamik isumalluuteqarneq annikillisarneqassappat nukissiuutit avatangiisinut mingutsitsinngitsut aallartisarnissaannut Naalakkersuisooqatigiit sulissuteqartariaqarput.

Kommuneq Qeqertalimmi Inuit Ataqatigiit Siumut isumaqatigiissutaat

Qasigiannguani ergnup nukinganik nukissiorfiliassaq Kommune Qeqertalimmi inuussutissarsiornikkut nukissiuuteqarnikkullu inerisaanermi iluaqutaassaaq. Kommune Qeqertalimmi Inuit Ataqatigiit, Siumullu suleqatigiinnissamut isumaqatigiissutaanni nukissiuteqarnermi erngup, anorip allallu inerisaaffiginissaat erseqqissumik allassimavoq:

“10. Nukissiuuteqarnermi erngup, anorip allallu atorlugit inerisarnissaat, inoqarfinnilu pilersitsivigineqarsinnaasuni pinngortitap tunniussinnaasaasa sutigut qanorlu ineriartuutaasinnaanerisa sulissutiginissaat.

Kommune Qeqertalimmi erngup nukinganik inerisaanissamut aammalu pinngortitamut mingutsitsinngitsunik nukissiuutinik pilersugaanissaq soqutigivarput.

Kaammattuut

Takornariartitsisarneq inuussutissarsiornerlu pillugit Aasianni isumasioqatigiittoqaqqammerpoq. Aasianni inuussutissarsiutit takornariaqarnerlu pillugit ulluni marlunni isumasioqatigiittoqareersorlu Kommune Qeqertallip Naalakkersuisullu inuussutissarsiutit suleqatiigissutigilerpaat. Kommune Qeqertalik Naalakkersuisullu inuussutissarsiutit pillugit suleqatigiilernerat ilutigalugu Qasigiannguani erngup nukinganik nukissiorfiliassap aallartisarneqarnissaata piviusunngortinneqarnissaatalu sulissutigineqarnissaa kaammattuutiginarpoq, inuussutissarsiornermi nukissiuteqarnermilu periarfissarpassuarnik ammaassammat.

Ikinngutinnersumik inuulluaqqusillunga
Aqqa Samuelsen, Inuit Ataqatigiit
Kommune Qeqertalimmi kommunalbestyrelsemi ilaasortaq