Inuit Ataqatigiit: Danskit aningaasaqarnermut ministeriata akissutaa pakatsinartoq

04.10.13

Inuit Ataqatigiit folketingimi ilaasortaatitaata Sara Olsvigip aamma siulittaasuata Kuupik V. Kleistip ataatsimoorlutik danskit 2014-mut aningaasaqarnermut inatsisissaannut siunnersuummut qisuariaateqarlutik danskit aningaasaqarnermut ministeriannut statsministerimullu allakkiaat sapaatip akunnerani matumani akineqarpoq. Akissummut IA-p qisuariaataa erseqqippoq: Akissut pakatsinarpoq, taamaattorli pisami ataatsimi iluarsiisoqarnissaanik neriunaateqartitsivoq

Johan Lund Olsen Sara Olsvigip sulinngiffeqarnerani IA-p folketingimiititaa ima oqarpoq: ”Aningaasaqarnermut ministerip Bjarne Corydonip (S) akissutaa oqaluuserisimavarput, paasivarpulli aaqqiissutissanik siunnersuutissaqanngitsut iluarsiivigineqartussatullu siunnersuutitsinnut tunngatillugu oqaloqatigiinnissamulluunniit piumassuseqarpasinngitsut. Tamanna alianarpoq”.

Inuit Ataqatigiit 6. septemberimi aningaasaqarnermut ministerimut statsministerimullu allagaqarnerminni pissutsit arlalissuit nunatsinnut tunngassuteqartut partiillu pitsanngorsaavigineqartussatut isumaqarfigisai pillugit saaffiginnipput. Pineqartut tassaapput eqqartuussiveqarnermut tunngasut, pinerluuteqarsimasunut isumaginninnermut tunngasut, Danmarkimi kalaallinut ikiortarialinnut ikiorsiissutitut ingerlassanut tunngasut, University of the Arctic-imut tunngasoq kiisalu illersornissamut namminersortuunissamullu ilungersuuteqarnermut tunngasut. Pisat tamarmik danskit akisussaaffiiniipput, IA-lu ukiuni arlaqalersuni tamakku pillugit pitsanngorsaatissanik ilungersorluni sulissutiginnissimavoq.

Sara Olsvig: ”Oqaatigiinnarsinnaavara danskit naalakkersuisui pitsaanerusunik iliuuseqatariaqaraluartut, uanilu oqaloqatigiittoqarnissaanut ammaassisoqarnissaa minnerpaatut naatsorsuutigisimagaluarpara. Maanna danskit aningaasaqarnermut inatsisaannut suliamut partiitsinni qanoq ingerlariaqqinnissarput eqqartussavarput”.

Johan Lund Olsenip oqaatigivaa pisami ataatsimi maanna partiip suliniutigisimasaminut tunngatillugu kiisami angusaqalerunartoq:

Aningaasaqarnermut ministeri allappoq ikiuinermut tunngatillugu ingerlassanut immikkut aalajangersimasumik aningaasaliissutissanut periarfissanik nassaarniartoqassasoq, tamannalu iluatsissappat tassuuna angusaqartoqassaaq. Tassungalu suliaq soorunami qanimut malinnaavigissavarput”, Johan Lund Olsen naggasiivoq.

Inuit Ataqatigiit aningaasaqarnermut inatsisissamut siunnersuummut toqqaannartumik apeqquteqaateqarsimavoq, taakkualu uani atuarneqarsinnaapput: www.iafolketinget.dk