Covid-19-ip ajornartorsiortitsinerani politikkikkut siuttuulluarnermik iliuuseqarsinnaanermillu takutitsisinnaasumik borgmestereqarnerput Kommuneqarfik Sermersuumi Inuit Ataqatigiinniit tulluusimaarutigaarput.

Nunarsuaq tamakkerlugu ajornartorsiornermi naatsorsuutigeriinngisamik aalajangiinerpassuit nalaanni Kommuneqarfik Sermersuumi angerlarsimaffeqanngitsut ikiorasuarneqarput. Tamanna pillugu borgmestererput, Charlotte Ludvigsen, piffissap sivikitsuinnaap ingerlanerani unammilligassamik taamak annertutigisumik aaqqiimmat kakkagalugulu tulluusimaarutigaarput.

Taamatut piffissami ajornartorsiorfiusumi politikkikkut aallaaviusoq tassaavoq inuunernik annaassinissaq, tamanit salliutillugu inuuneq toqulu qinigassaammata.

Piffissami ajornartorsiorfiusumi aatsaallu misilinneqartumi kukkusunik aalajangiinissamut periarfissaqartuaannarpoq. Taamaattumillu politikkikkut sapiissutsimik iliuuseqarsinnaanermillu takutitsinissaq pingaaruteqarpoq. Borgmester Charlotte Ludvigsen taamatut takutitsivoq.

Aalajangikkat nalilersornissaannut misilittakkallu ilinniarfiginissaannut piffissaq takkutissaaq. Innuttaasulli qajannaatillit ajornartorsiorfimmiittullu akigalugit, Covid-19-imut illersorniarlugit politikkikkut aalajangikkanik pasinarsaanissamut piffissaanngilaq.

Akerlianilli nunarsuaq tamakkerlugu tunuluuttoqarnerani politikkikkut inissisimaffiit akimorlugit suleqatigiinnissaq pisariaqarpoq.

Inussiarnersumik inuulluaqqusillunga

Inge Olsvig Brandt

Kommuneqarfik Sermersuumi Inuit Ataqatigiit sinnerlugit

Share and Enjoy !

0Shares
0 0 0