All: Stine Egede, Kommune Kujallermi kommunalbestyrelsemi ilaasortaq

Borgmesterip ukiuni qulini pilersaarutaanut qisuariaat

Borgmester Kiista P. Isaksen-ip Sermitsiami oqaasiinut akissuteqartariaqarlunga misigisimavunga.

Ukiunut qulinut pilersaaruteqarnissaq immini ajunngivippoq. Oqariartuutilli ilaat apeqqusertariaqarpakka; sooq qinersisoqalermat Inunnik Isumaginnittoqarfik ”soqutiginarseriataartutut ippa?”. Maannali qinersilernermi saqqummiunneqarmat tupiginngitsuunngilara, tassami ukiunut sisamannguanut pilersaaruteqarsimaneranik takusassaqanngilagut.

Kiista P. Isaksen Borgmesterinngormat isumalluarfigisimagaluarpara isumaginninnerup silarsuanit aggersuummat, ajoraluartumilli oqaatigisariaqarpara aatsaat taamak tukatsigisumik, pakatsinartigisumillu ukiuni kingullerni isumaginnittoqarfimmi ingerlatsineq pisimammat. Sulisut pikkorissut annaajorarpavut, pisortat taarseraatiinnavipput, qaammatini arlaqalersumi pisortaagallartumik atorfeqartitsivugut. Pisortaagallartup nalinginnaasumik akisussaaffigisaa allanit ingerlanneqarpoq. Peqatigisaanittaaq pisortaqarfinni pisortaasut pingasut utaqqiisaasumik pisortaagallarput.

Ukiut kingulliit arlaqalersut Isumaginnittoqarfimmi ukiut tamaasa immikkut aningaasaliisoqartariaqartarpoq. Ilaatigut 5 mio. kr. sinnertarlugit.

Siorna atorfiit inuttalerneqanngittut 22-it ”sipaarutigineqarput”, tamanna ukiup 2020-ip ingerlanerani annertoorujussuarmik Isumaginnittoqarfimmi sulisunut nukillaarsaataavoq, sulisut arpaleraarnerusariaqarmata. Siumup 2020-imut aningaasaqarneq akuersissutigaa, Inuit Ataqatigiit itigartitsisugut.

Ukiormanna 2021-mut aningaasalerinitsinni Kommunalbestyrelsemi ammasumi ataatimiinneq tikillugu Siumumi ilaasortat aningaasanut pilersaarut akuerileraluaraat ilungersorluta Inuit Ataqatigiinni uteriisernitsigut 10 mio. kr-nik immikkut aningaasaliitippavut. Siumumi ilaasortat oqaloqatigiilluartarsimannginnamik Borgmesterertik paasitilluarsimagunannginnamikku tupangaarlutik Isumaginnittoqarfimmi atorfiit 25-it inuttalerniarneqalinngitsut aatsaat kommunalbestyrelsemi ataatimiinnermi ”paasineqaleriasaarpoq”. Naalaartut eqqaamassavaat kommunalbestyrelsemi ataatimiinneq unikkallartinneqarmat.

Borgmesteri innuttaasunik peqataatitsinerarlunilu tusarnaarluartarnerarpoq, kisianni tamanna innuttaasummita qanoq oqaaseqarfigissavaat. Nalunngilarpummi ukiormanna akerliussutsimik takutitsinerit imaaginnavissimapput. Februarimi Campus Kujallermi paasissutissiinerusumik inunnik katersuisitsisoqarpoq, inuit ilaasa aalassaatigisaannik. Misigigamik tusaaneqarumanatik, illuinnaanik paasissutissiissutaanerusumik saqqummiisoqartoq. Borgmesteri neriorsuivoq ukiup ingerlanerani oqallitsitsinerit pisarumaartut, tamanna piviusunngorpa?

Borgmesteri siuttutut suleqatigiissitsisinnaannginnini qinersivik aallartimmalli takutippaa. Atassutikkut sivikitsuararsuarmik suleqataareerlutik suleqataajunnaarput. Inuit Ataqatigiit suleqatigiumaneqanngilagut Isumaginninnermut aningaassaliissutit ukiuni naatsorsuusiorfinni ukiumut 10 mio-nik ilaneqartarnissaat piumasarigatsigu. Taamaakkaluartoq ataatimiititaliani suleqataalluarpugut, naak aaliangiinerit tamaasa peqataaffigisanngikkaluarlutigit.

10 mio. kr. aningaasaliinerusarnissaq ilaatigut meeqqat angerlarsimaffiup avataanut inissinneqartartut ikiliartortinneqarnissaannut suliniarnernut aammalu assigiinngitsutigut katsorsartariaqartunut atorneqarsinnaasussaagaluarput.

Kommune Kujallermi ukiuni kingullerni Kuannersuit Mittarfillu assut initutinneqarsimapput. Inuit ulluinnarni atugaat, atuarfeqarneq takornarialerineq, aalisakkanik allatut eqqarsarluni ineriartortitsineq, neqiliortunik allanik inerisaaneq, naatitaateqarnermik inerisaaneq, Inuili, Neqilu suleqatigalugit nioqqutissanik ineriartortitsineq annerusumik ingerlanneqanngillat.

Piffissanngorpoq suut tamaasa periarfissat atorluarlugit Kommune Kujallermi inerisaanissaq.

Qassiarsummi atuarfiliarniarneq assersuutissaqqissut ilagaat. Borgmesterip aallartinnermini suliassanik tigusinerminilli malinnaalluarsimannginnerata kinguneraa maanna atuarfik pisariaqartinneqaqisoq kinguarsaqqinneqalermat, minnerunngitsumik kommuunimut millioninik arlalissuarnik immikkut aningaasaliisariaqarnermik kinguneqartoq. Tassani aamma akisussaaqataalluinnarput ataatimiititaliani susassaqartuni siulittaasuusut. Suliassartik malinnaaffigisimanngilaat. Tamanna politikkikkut qimarratiginninneruvoq illersorfissaqanngitsoq.

Ineriartorneq ingerlalluassappat Siumumik taasinissamik Borgmesterip oqariartuuteqarnera aatsaat taama nangiarnartigisutut taasariaqarpara. Ukiut kingulliit aningaasatigut ingerlalluarsimanermik oqariartorneq takunnikkusunngitsutut ililluni sunniiniarnertulli taasariaqarpara. Aningaasaateqarsimagutta sooq utoqqarnik angerlarsimaffimmi ikiorteqartitsinerput taama annikitsigaa? Sooq meeqqeriviit malinnaatilimmik akikinnerulinngillat? Sooq Qaqortumi Utoqqaat illuata igaffiata ilassitissaa sananeqarsinnaanngila? Sooq innarluutillit Narsami inigisaat taama ajortigaa?

Sooq angerlarsimaffeqanngitsut kommune tamakkerlugu ikiorserniarneqanngillat, naak Narsami ilaat akeqanngitsumik ineqartinneqartut? Sooq Aapilattuni inuusuttunut illuliorsinnaanngilagut, naak sanaartornermut aningaassaliissutaasartut 14 mio. kr. sinnerlugit ukiup tullianut nuutsinneqartut.

Siumumik qinersineq imaaginnartussaassaaq ullumikkut pissutsinik akuersaarneq politikkikkullu suleqatigiissitsilluarsinnaannginnermik akuersaarneq.

Inuit Ataqatigiinni siuttunngussagutta politikkimik suleqatigiilluarneq anersaaralugu sulissaagut, Kommune Kujalleq ataatsimuulersimanngitsutut suli ittoq ilungersorluta tamat peqataatillugit aaqqissuuteqqissavarput. Minnerunngitsumik partiit tamarmik ataatimiititaliani ilaasortaatitaqarnissaat pingaartillugu qulakkiissavarput. Ullumikkut Atassutip ilaasortaatitaa ataatimiititaliani ilaasortaaffeqanngilaq. Tamanna qinersisartunut suusupaginninneruvoq.

Ullumikkutut ingerlaannarutta kinguaavut illoqarfinnut ineriartorfiusunut ingerlaartuassapput.

Siumup Naalakkersuisuutitaqaraluarluni iluminni suleqatigiilluarsinnaannginnerisa takutippaat Borgmesterip Naalakkersuisuutitaminik suleqateqarluarsimannginnera.

Stine Egede, Inuit Ataqatigiit.

Share and Enjoy !

0Shares
0 0