All. Peter Olsen & Sofia Geisler, Inuit Ataqatigiit Inatsisartuni

Atuarfeqarneq ilinniartitaanerlu pillugit aaqqissuusseqqinniarneq

Ataani atsiortugut Ilinniartitaanermut, Kultureqanermut Ilageeqanermullu Ataatsimiititaliami Inuit Ataqatigiit sinnerlugit ilaasortaasugut ataatsimiititaliakkoorlugu innersuussutigaarput ilinniartitaanermi iluarsartuusseqqinnissamik ukiorpassuanngortuni sulissutiginiarneqartup unitsinnissaa, nukiillu atorneqassasut maannakkut iluarsineqarsinnaasunut nukittorsaanermullu. Maannamut tamakkiisumik iliuuseqannginnikkut meeqqat amerlavallaarujussuartut meeqqat atuarfianniit ingerlaqqinngitsoortarput, qularutissaanngilarlu atuarfiup ingerlanneqarnera massakkut nukittorsartariaqarmat.

Qinigaaffiit maannamut ikinnerpaamik marluk ingerlaneranni pisaq suliarineqarpoq. Qinigaaffiit maannamut marluk ingerlaneranni meeqqat atuarfiat pillugu Inatsisartunut aalajangiiffigisassanngortinneqartut arlaqartut ilinniartitaaneq pillugu suliaqartoqarnera innersuussutigalugu itigartinneqartarput. Piffissap ingerlanerani meeqqat atuarfiata ingerlanera, maannamut ataasiaannarluni naliliiffigineqartup, itinerusumik oqaluuserineqanngitsoortarpoq, taamaasillunilu inatsisiliortutut suliassat tassunga tunngasut meeqqat atuarfiata ukkatarineqarluinnartariaqarneranik imallit tikinneqanngitsoortarput. Tamatuma peqatigisaanik maannamut inuusuttorpassuanngortut meeqqat atuarfianniit ilinniaqqiffinnut ingerlaqqinngitsoortartut amerliartorput.

Meeqqat atuarfiat pillugu inatsit sinaakkusiisoq Kommunellu aqutsinerat manna tikillugu qanimut sukumiisumillu sammineqarani nukippassuit atorneqarput siunissami iluarsartuusseqqinniarnermut tunngasunik imalimmik, tamannalu inuiaqatigiinnut sutigut tamatigut akisoorujussuanngorpoq.

Iluarsartuusseqqinniarneq siunertaralugu manna tikillugu sulinermi innersuussutigineqartut maanna iluaqutissanngortinneqareerlik, meeqqallu atuarfiata 2015-imi nalilersorneqarsinerani innersuussutigineqartut iliuuseqarfigineqarlik. Pissusissamisuussaarlu ataasiaannarluni nalilersuisimaneq naammaginagu malitseqartinneqaqqippat.

Inuiaqatigiinnut nukittuunut meeqqat atuarfiat tunngavisseeqataavoq, inuiaqatigiit assigiinngiiaartunik piginnaasaqartut namminerisaminnik inuulernissaannut tunngavisseeqataalluni, inersimasunngornermilu qaammatit tamaasa aalajangersimasumik isertitaqarnissamut aqqutissiuussisussaalluni.

Inuulluaqqusilluta

Peter Olsen                                     Sofia Geisler

Share and Enjoy !

0Shares
0 0 0