Attartortunik illersuineq takujuminaatsoq

Ineqarneq pillugu § 37 naapertorlugu apeqqutikka 2018-328 akillugit Naalakkersuisut allapput inissiat attartortittakkat oqummik eqqugaasimasut siornatigut oqoqarsimanersut INI A/S-imi immikkut nalunaarsorneqarneq ajorput.

Tamanna uanni minnerpaamik marlunnik ernumalersitsivoq. 

Siulleq tassaavoq inissiaatileqatigiiffimmi pisortanit pigineqartumi aaqqissuussisoqarsimanngimmat tamakkiisumik takussutissiisumik oquup ajornartorsiutaanerata qanoq annertutigineranik. Aappaattut inoqarmat oqummik ajornartorsiuteqarfiusunik neqeroorfigineqarsimasinnaasut najugaqalersimasinnaasullu inissiani oquk pillugu ajornartorsiuteqarfiusimagunik nalunaarsorneqannginnerat pissutigalugu paasissutissanik erseqqarissunik takussutissaqarfiunngitsuni. Inissianik attartortut taamaammat inissianut nuussimasinnaapput siornatigut oqummik ajornartorsiuteqarfioreersimasuni. Ilisimassarlu taanna pingaaruteqarluinnartoq inissiaatileqatigiit attartortullu piginngitsoorsimasinnaavaat. 

Pissusissamisuunngilaq. Kukkorujussuanngikkuma paasivara pisortat ingerlataannik inissiaatileqatigiiffimmik peqartugut, taamalu aamma politikkikkut aqutsisunik, inissiat attartortittakkat qanorpiaq pitsaatiginerannik pitsaatiginnginnerannilluunniit oqaluttuussisinnaanngitsunik. 

Attartortut illersorneqarnerat takujuminaatsoq

Akissutigineqartumi erserpoq illoqarfinni annerni sisamani inissiat oqummik ajornartorsiuteqartut ilisimaneqartut 171-usut, taakkulu ilaat 64-it suli najorneqartut. Eqqumiiginartippara nuna tamakkerlugu attartutut tallimaannaammata oquk pissutigalugu inissiamik allamik utaqqisut.

Ernumanartippara attartortut taama amerlatigisut suli najugaqarmata inissiani oqummik ajornartorsiuteqarfiusutut ilisimaneqalereersuni.

Apeqqutit arlallit uanni pinngorput.

Inuit pineqartut peqqissusaat maannakkut ungasinnerusorlu eqqarsaatigalugu qanoq sunnerneqarpat? Inoqarpa inissiani oqummik ajornartorsiuteqarfiusuni najugaqartunik tamannalu napparsimasalissutigereersimagaat, immaqalu sulinerannut sunniutereerluni? Inissiani oqummik eqqorneqartuni najugaqartariaqarnerminni qaammammut akiliutaat appartinneqarpa?

§37 naapertorlugu apeqqutinni 2018-191 erseqqissumik takuneqarsinnaavoq attartortitsinermut maleruaqqusani attartortut ataasiakkaat illersorneqanngitsut. Pisortat namminersortulluunniit pigisaanni attartorniartut ilisimatinneqarneq ajorput inissiami nuuffigiligaanni oquk siunerusukkut ajornartorsiutaasimappat.

Attartortut ataasiakkaat illersorneqarnerat inatsisiniittariaqarluinnaraluartoq takujuminaappoq.

Tamanna Inuit Ataqatigiinni ukkatarissavarput. 

Inuulluaqqusillunga

Sofia Geisler
Inuit Ataqatigiit Inatsisartuni