Allattoq: Stine Egede, peqqinnissaq pillugu oqaaseqartartoq

Atassummut akissut

Suliani angisuuni aaliangeeqataasimagaanni, tanngassimaarutigalugulu nuanniissaqaaq ullut piviusut takulerlugit tassalu utersaariarsinnaajunnaareerluni.

Taama Atassutip Nunatsinni Peqqinnissaqarfik pillugu tusagassiuutitigut saqqummernera qisuariarfigaarput. Inuit Ataqatigiit ataatsikkut mittarfiliornernut isumaqataannginnatta akerliliisimavugut. Naak mittarfiliornissaq immini itigartinngikkaluarlutigu, taamaattoq naafferarlugit suliarineqarnissai kissaatigisimagaluarpagut, kiisalu aningaasalersuinissat ersarinnerusumik paaseqqaarusussimagaluarpagut.

Ullumikkut ajoraluartumik, aaliangernermiit ukioq ataasiunngitsorluunniit ingerlareersoq, takusinnaalereerpagut kingunissai nunatsinnut malunniukkiartulereersut. Peqqinnissaqarfik pissutsit imaannaanngereeraluaqisut annertunerusumik piorsarniarneqanngilaq.

Tusarsaalereerput peqqinnissaqarfiup iluani sipaarniaqqusinermik piumasaqaatit. Meeqqat kigutaasa bøjlilersuineqartarnerat assersuutigiinnartigu. Maleruaqqusaq allanngortinneqanngitsoq Naalakkersuisut oqariartuutigaat aningaasanullu inatsimmut isumaqatigiinninniutissanngortinniarlugu. Pissutsit taamaattut akuersaarneqarsinnanngillat.

Kommuuninut tamakkiisumik tapiissutit ikiliallatsinniarneqarput. Innarluutillit inatsisissaat 1. Januar 2020-mi atuutilertussaq eqqarsaatigiinnarluguluunniit, kommuuninut annertuumik aningaasaqarnikkut kingunerluttussaasoq kialuunniit naatsorsorsinnaavaa. Aningaasatigummi malitseqartinneqarnissaa takussutissaqanngilaq.

Inuit Ataqatigiinni isumaqanngilagut oqartussaaffiit akisussaaffigisagut inuiannit allanit akisussaaffigineqassasut. Nunatsinni ilinniartitaanerput inerisartuassavarput, peqqinnissaqarfimmi sulisussavut nammineerluta inerisartariaqarpavut. Peqqinnissaqarfik inerisartuartariaqarparput Nunatsinni pissutsit aallaavigalugit, immikkuullarissuunerput, nunattalu isorartussusaa aallaavigalugu.

Politikkikkut akisussaaffimmik qimarratiginninnerussaaq oqartussaaffiit Qallunaat Nunaannut utertinniarlugit suliniassagutta aamma Namminersorneq Pillugu Inatsimmut killormuuliornerusussaavoq. Danskinik suleqateqarneq pisariaqartitsineq aallaavigalugu soorunami pitsanngorsarneqartuarsinnaavoq.

Isumaqarpugulli pissusissamisoornerpaassasoq ataatsimoorfigissagipput, qangatut aqutsineq Københavnimut utertinnagu  Peqqinnissaqarfik nammineerluta inerisarutsigu, suliffigissallugu kajuminnartoq minnerunngitsumillu innuttaasunut toqqissisimanartoq.