Allattoq Naaja H. Nathanielsen, Inuit Ataqatigiit

Asasara Kim Kielsen,

Qujanaq allakkannut takisuunut isumaga naapertorlugu sukumiisumik akisariaqakkannut. Uggorigaluarpara taamatut allaffigisariaqarakkit. Tassami politikkimik oqalliseqarnissarput piumanerugaluarpara. Inatsisartunullu ilaasortatut pissutsit inatsimmik unioqqutitsisut taakkartussallugit pisussaaffeqarlunga misigisimavunga. Oqallinnerup matuma naammassinissaa qilanaarivara, taamatullu politikkikkut oqariartuutit aaqqiissutissallu aallunneqalernissaat qilanaaralugit.

Kikkut aalajangiisinnaatitaappat?
Siullertullu partiinut siulittaasuusut Inatsisartunili ilaasortaanngitsut ataatsimiigiaqquneqartarsimanerannut pissuseq eqqortuunngitsoq unitsikkakku qujanaq. Oqaloqatigiittarnerimmi pitsaasuunerat isumaqatigiissutigisinnaavarput. Oqaloqatigiinnerlu tamanna soorunami Inatsisartunut qinigaasimasut, taamatullu nipangiussisussaatitaanermik malittarisassanik il.il. malinnittussaasutut inissisimasut akornanni pissammat isumaqatigiissutigisinnaavarput. Taamaattumilluuna qineqqusaarnerup sinnerani ”Partiit Inatsisartuniittut” attavigisarnissaannik tunngasumik allattutit, imaanngitsoq partiit siulittaasuinik. Tamannalu pillugu isumaqatigaatsigit.

Aamma partiit aalajangiinernut akisussaaqataatikkunnaarneqarnerat nuannaarutigaarput. Partiit siulittaasuisa pisanut aalajangeeqataanissaannik qinnuiginnittarsimaneq unitsinneqarmat nuannaarutigaarput.

Inatsit nutaaq atuuppoq erseqqaripporlu.
Soorunami ilumoorputit oqaravit inatsit malinneqartoq tassaasoq Inatsisartut Naalakkersuisullu pillugit Inatsisartut Inatsisaat nr. 26, 18. november 2010-meersoq. Ilumoorputillu inatsimmut atuussimasumut naleqqiullugu oqaatsit atorneqartut sukateriffigineqarsimammata. 2010-i sioqqullugu piusumut naleqqiullugu allannguuteqarsimanngilaq, maannali Naalakkersuisuugallartut susinnaaneri susinnaannginnerilu erseqqinnerusumik allanneqarsimapput. Tamannaluuna aallaavigalugu aalajangikkat ilaannut Inuit Ataqatigiinniit isumakuluuteqartugut. Politikkikkut qinngasaarinertut paasineqarmat ajuusaarutigaarput. Uagummi inatsisip malinneqarnissaa suleqatigiinnerullu inatsimmik aallaaveqarnissaa pivagut.

Saattussat qineqqusaarutitut?
Namminersorlutik Oqartussat ulluinnarni ingerlataat politikkikkut qineqqusaarnerit avataanniitinneqassammata isumaqatigilluinnarpakkit. Taamaattumillu saattussanut pisassiissutit nuunneqarnerisa tunngaviatigut malittarisassanik unioqqutitsinikkut pisimasinnaanerannut paasisaqarnissarsi neriuutigaara. Paasivara pisaq maannakkut Aalisarnermut Siunnersuisoqatigiinnut saqqummiuneqartoq kingornalu politikkikkut nutaamik aalajangiivigineqassasoq. Tassami inatsimmut oqaaseqaammi erseqqissumik allassimavoq qineqqusaarnerup nalaani ”salliutinneqartutut isigineqarsinnaasumik” Naalakkersuisut aalajangiisinnaatitaanngitsut. Isumaqarpungalu pisasseeqqinneq ”salliutinneqartutut isigineqarsinnaasumik” aalajangiinerusoq.

Allapputit saattussanut pisassiissutip agguataaqqinneqarnerani ”pisassiissutit aalajangerneqarsimasut suliffissanik aningaasatigullu isertitassanik amerlisaanernik kinguneqarsinnaasut.”

Imaassorinarsivoq uagut Inuit Ataqatigiinniit saattussanut pisassiissutit ilaneqarneranni suliffissanik isertitassanillu amerlisaanissaq akerlerigipput. Taamatut isumaqartitsilerneq ilungersunarluinnartuuvoq. Inuit Ataqatigiinniit taamaallaat malittarisassat malinneqannginnerat isumakuluutigaarput.

Peqatigitillugulu eqqaasitsissutigissavarput saattuartassat pisarereernerisigut aalisarnermik aallutaqartut annaasaqassanngimmata. Uanimi pisassiissutip allamut tunniunneqareersimasup ilassutitut tunniunneqarnera pineqarpoq. Tassa annaasatut taaneqarsinnaanngillat, taamaattumillu inatsimmut oqaaseqaatit eqqarsaatigalugit tunngavilersuutitit eqqarsarnartoqarput. Taamaattumik saattussanut pisassiissutit qaqeqqinneqarnissaanni Naalakkersuisunit malittarisassat qimeerloorluarneqarnissaat aammalu Naalakkersuisut aalajangiinermut tunngasumik ammalluinnarumaartut neriuutigaakka.

Nunaoil-imut sinaakkutit ersarissut
Nunaoil A/S-imut tunngatillugu Naalakkersuisuugallartunut malittarissat unioqqutinneqarsimanersut pillugit paasisaqarusussimavugut. Naalakkersuinikkut akuliuttussaatitaannginnerup unioqqutinneqarsimaneranik aallaaveqartumik siulersuisut tamakkerlutik tunuarsimanerat pillugu qisuariarpugut. Isumaqarpugut politikkikkut suliaqartut kikkulluunniit tamanna soqutigisariaqaraat. ”Ingerlatseqatigiiffimmi siulersuinerup qaammatini arlaqartuni immineerneqarnissaa” anguniarsimanngilarput. Paasissutissanik pilersaarummillu ujartuisimavugut. Pilersaarullu tamanna illit Sara Olsvigimik kingullermik ataatsimeeqateqaravik saqqummiunneqarsimanngilaq. Isumaqartuarsinnarpugut innuttaasunut pilersaarummik saqqummiussaqarnissat suli suliassarigit.

Apeqqutit qaqitagut pisariaqartuunngitsutut isigisimagukkit ajuusaarnarpoq. Ajornartorsiutinik tikkuussinngikkaluarutta tamanna akisussaassuseqannginnermik takutitsinerussagaluarpoq. Tusagassiutitigut sammineqarneranni piffissaq atorneqartoq eqqarsaatigalugu politikkikkut oqallinneq perusunnarnerugaluartoq isumaqatigiissutigisinnaavarput. Taamaattumillu Naalakkersuisuugallartut atuuffimmikkut kukkutaarnernut ’pisassaat’ nunguttutut isigisariaqarput.

Inussiarnersumik inuulluaqqusillunga

Naaja Hjelholt Nathanielsen

Attaveqarfissaq: 54 89 81/nana@ina.gl

 

Paasissutissat:

Inatsisartut Naalakkersuisullu pillugit Inatsisartut Inatsisaat nr. 26, 18. november 2010-meersoq.

  • 29:

Naalakkersuisut atuukkunnaarsinneqarpata imaluunniit soraarnissaq qinnutigippassuk imaluunniit nutaamik qinersinissaq nalunaarutigineqarpat, Naalakkersuisut nutaat qinerneqarnissaasa tungaanut Naalakkersuisut atuukkallassapput. Naalakkersuisuugallartut atorfimmi suliassat ingerlaannarnissaannut pisariaqartunik taamaallaat suliaqarsinnaapput.”

Inatsimmilu paragraf 29-imut oqaaseqaammi tamanna suli ima erseqqissarneqarsimavoq.

Aalajangersakkap taassuma siunertaa tassaavoq Naalakkersuisut imaluunniit Naalakkersuisunut ilaasortat ataasiakkaat piffissami Inatsisartunit atorfeqartumut naalakkersuinikkut piginnaatitsinerup atorunnaarfigisimasaani sanngiilliffigisimasaaniluunniit naalakkersuinikkut suliniutinik nutaanik aallarnisaannginnissaat. Suliniutit ingerlareersut qineqqusaalernermut qineqqusaarnermulluunniit ilaasutut salliutinniarneqartutut isigineqarsinnaasumik aamma ingerlanneqassanngillat. Malittarisassaq taamaalilluni Naalakkersuisut aningaasaliissutinik, piginnaatitsissutinik imaluunniit atorfimmut atugassiissutinik qineqqusaarnerup il.il. nalaani taamaaliortussaanani iluaqutiginninniarnermik pasilliisoqarsinnaaneranut illersuutitut atorpoq.”