Arnanut nakuusertarnerup akiorniarneranut Naalagaaffiit Peqaatigiit ulloq 25. november ullorititaaraat. Arnat nakuuserfigineqartarnerat Inuit Ataqatigiit akuerinngilaat. Arnanut nakuusertarnerup akiorniarneranut suliniutit periarfissallu ersarinnerusariaqarput, inuiaqatigiinnilu ulluni makkunani siunissamullu malunnaatilimmik naalakkersuinikkut iliuuseqartoqartariaqarluni. Arnat nakuuserfigineqartarnerat akiorniarlugu Naalakkersuisut erseqqissuliornerusariaqartut Inuit Ataqatigiinniit isumaqarpugut.

Nunatsinni arnanut timikkut tarnikkullu nakuusertarneq suli annertoorujussuusoq ajuusaarnartumik oqaatigineqarsinnaavoq. Nunatsinni arnat nakuuserfigineqartarnerat ilungersunartuuvoq naalakkersuinikkullu erseqqissuliorfigalugu suliniuteqarfigineqartariaqarluni.

Arnat nakuuserfigineqartarnermikkut inuunerminni saaffissaaruttutut misigisimasarnerat ilaqutariippassuarnut minnerunngitsumillu meerarpassuarnut pitsaanngilluinnartumik sunniuteqartarpoq. Persuttagaaneq nakuuserfigineqarnerlu arnap misigissusaanut ulluinnarnilu inuuniarnikkut atugassarititaasunik sakkortuumik aseruisarnera naalakkersuinikkut eqqumaffigineqartariaqarpoq. Sineriammi arnanut qimarnguinnut atugassarititaasut assigiinngitsorujussuupput, illoqarfiit ilaat qimarngueqanngillat, ilaat namminneq ingerlasuupput, ilaallu kommunenit aqunneqartut.  

Inuiaqatigiit atugarissaarnermik toqqammaveqarlutik naligiissitaanermik ingerlatsiffiusut tassaapput inuiaqatigiit arnanik timikkut tarnikkullu persuttaaffiunngitsut. Nunarput maangamut annertuallaamik suli arnanik persuttaaffiusarmat inuiaqatigiittut ikioqatigiinnikkut akiortariaqakkatsinnik nassuerutissaqarpugut. Arnanut nakuusertoqarsimatillugu amerlasuutigut meeqqanut aamma sunniuteqapiluttarpoq. Anaanaasup persuttagaanerata saniatigut  aamma meeqqat tarnimikkut persuttarneqaatigisaraat ilisimaaraarput, meeqqallu  angerlarsimaffimminni ersiorlutik inuusariaqartarlutik. Arnanut nakuuserfigineqartartunut meeqqanullu periarfissarititavut pitsaanerulertariaqartut, tamaviaarullugulu sulissutigisariaqarparput arnat nakuuserfigineqartarunnaarnissaat qulakkeerneqartariaqarmat.

Nunarput tamakkerlugu Politiit immikkut suliniutigisimasaat “Nakuusernata oqaloqatigiitta” pitsaasumik angusaqarfiusumillu misilittagaqarfigaat, uggornaqisumilli sulisussaaleqinertik pillugu annerusumik ingerlakkunnaarsimallugu.

Illernit Qeqertarsuarmi inissisimasoq nuna tamakkerlugu qimarnuiulluni katsorsaaviuvoq. Tassani arnat nakuuserfigineqarsimasut meeraallu, ukioq ataaseq tikillugu sivisussusilimmik tapersersorlugillu ilinniarsimasunik katsorsarnissaannut neqerooruteqartarpoq. Illernit arnanut atugassarititaasut pitsanngorsarniarlugit ullut tamaasa suliniuteqartuarnera Inuit Ataqatigiit naleqartippaat, arnat nakuuserfigineqarsimasut isumassortariaqavissortullu illersugaallutik pitsaasumik alloriaqqinnisaannut katsorsarneqartarmata. Siunissaq eqqarsaatigalugu Illernit annertusaaffigineqarsinnaanera sinerissamilu arnanut nakuuserfigineqarsimasunut pinaveersaartitsinermi suliniutit nukittorsarnissaat naalakkersuinikkut siunnerfiusariaqartoq Inuit Ataqatigiit isumaqarput. Illernit atorluarneqarnerata takutippaa nunatsinni arnanut nakuuserfigineqarsimasunut pinaveersaartitsinerit ersarinnerunissaat pisariaqartoq.

Inuit Ataqatigiit

Aqqa Samuelsen, Isumaginninnermut meeqqallu pillugit oqaaseqartartoq.