Aningaasaliiniarneq kimut iluaqutissaq

Inuit Ataqatigiinniit maluginiarparput suliniutinut assigiinngitsunut amerikarmiut tapiiniarneranni annerpaamik pineqarmat amerikarmiut ilisimasalittaannik suliarineqartussanik ilisimasanik katersuinissamut aningaasaliissuteqarniarneq. Tamanna Inuit Ataqatigiinniit ernumanartoqartipparput.

USA-p Danmarkimi aallartitaata arlaleriarluni oqaatigaa aningaasaliiniarneq annertooq pineqartoq, tamannali takujuminaatsipparput. Tassami aningaasaliiniarnermi iluaqutissarsisussaq annerpaaq tassaavoq USA-mi qitiusumik naalakkersuinermik aqutsisut, tassami ilisimasat Nunatsinni pingaarutilimmik ingerlatsinermut tunngassuteqartut katersorneqartut USA-mi immini katersugaataalerlutik pigineqalertussaammata.

Qularnaatsumik nalorninata Inuit Ataqatigiinniit oqaatigisinnaanngilarput ilisimatuut Nunarput pillugu ilisimasassanik katersugaasa ilumut Nunatsinnut kisimi iluaqutissanngortinneqassanersut. Ernumanartoqartilluguli oqaatigisariaqarparput USA-p suliniutinut aningaasaliissuteqarnermigut siunertarineraa naalakkersuinikkut aqutsinermi pisunut annerpaamik ilisimasaqalernissani, pingaartumik Qitiusumik Allaffeqarfik / Naalakkersuisoqarfiit eqqarsaatigalugit.

Suliniutit suulluunniit inuussutissarsiutinik nutaanik pilersitsinissamik, ilinniakkanik nutaanik periarfissiuussinissamut inuiaqatigiinnilu piginnaasat annertusarnissaannik siunertaqartut Inuit Ataqatigiinniit tapersersorpagut. Uanili Nunatta USA-llu akornanni suleqatigiinnertut annertuumik saqqummersikkusunneqartukkut takujuminaappoq Nunatsinnut iluaqutissartaa qanoq annertutiginersoq, takujuminarnerullunili USA-mut qanoq iluaqutaatigiumaarnissaa. Nikingasoqarpoq, kialluunniit takusinnaasaanik.

Naalakkersuisut innuttaasunut nassuiaasariaqarput suliniutinut aningaasaliinerit kimut iluaqutissanngortinneqarnersut, qanorlu qulakkeerniarneraat amerikarmiut ilisimatuuisa paasissutissat katersugaat kimik pigineqartussanngussanersut.

Inuulluaqqusilluta

Mimi Karlsen                                         Sofia Geisler

Nunanut Allanut Sillimaniarnermullu Ataatsimiititaliami ilaasortat (IA)