Angallannikkut kiffartuussinissamut isumaqatigiissut aaqqiivigisigu

Nunatta sineriaani silaannakkut imaatigullu inuit angallanneqarnissaannik kiffartuussinissamik isumaqatigiissut massakkorluinnaq aaqqiivigineqartariaqarpoq. Parti Siumut aammalumi partiit allat kaammattorusunnaqaat aningaasanut inatsimmi 15 mio.kr.-inik aningaasaleeqqinnermikkut S-61 nunatsinni marluulernissaat qulakkiissagaat.

Massakkut allatut aaqqiinissamut periarfissat naalakkersuinikkut suliarisimanngilavut. Kisianni aaqqiisoqartariaqarpoq. Aamma tamanna inuiaqatigiinniit kissaatigineqartoq partiit tamarmik tusaaniartariaqarpaat. Isumaqarpunga kiffartuussinissamik isumaqatigiissut ajorluinnartoq S-61-inik marlunnik atuutilersitsinikkut ikiorserneqartariaqartoq.

Kiffartuussinissamik isumaqatigiissut ajorigaanni, aaqqeqqugaannilu oqaluinnarani aamma naammagittaalliuinnarnani naalakkersuisooqatigiinniit taakkualu suleqataanniit manngagaaq aaqqiisoqarnissaa Inuit Ataqatigiinniit kaammattuutigaarput. Uagut aamma aaqqeeqataanissamut peqataarusuppugut. Aningaasanut inatsisissaq suli “ammavoq”, periarfissaq atorluarutsigu 15 mio.koruuninik aningaasaliilluta ukiuunerani sikusarfiusuni inuit assartorneqarnerat aaqqiivigisinnaagaluarparput.

Inuit Ataqatigiit tusaavarput partiit anginersaata Siumup arlaleriarluni kiffartuussinissamik isumaqatigiissutit aaqqinneqarnissaat noqqaassutigisaraat. Tassuuna isummagut assigiipput, aaqqiiniarta aningaasaliillutalu.

Nunatsinni innuttaasorpassuit aaqqiisoqarnissaanik noqqaanerat timitaliiffigineqartariaqarpoq. Inuppassuit angallannikkut akimmisaartinneqartut isiginiarneqartariaqarparput. Neriuppunga periarfissaq pigeriigarput atorluarlugu S-61 atorlugu silaannakkut inunnik angallassineq nukittorsarneqassasoq. Naalakkersuinikkut aalajangiisariaqarpugut. Akisussaaffik tigusariaqarparput. Massakkut allannguisariaqarpugut.

Inuit Ataqatigiit siunnersuutigaarput tamatta isumaqatigiilluta aaqqiissuteqarnissaq iliuuseqarfigalugulu timitalissagipput.

Inuit Ataqatigiit
Siulittaasuata tullia
Aqqaluaq B. Egede

Inuit Ataqatigiit Kattuffiat

Postboks 321, 3900 Nuuk
tlf.nr: (+299) 323 702
Fax: (+299) 321 321
Website: https://www.ia.gl
Email: ia@ia.gl
www.facebook.com/ataqatigiit
www.twitter.com/IAtaqatigiit

Attavigitigut/kontakt os

Imaneq 2
Telfon: (+299) 323702
Fax: (+299) 323232
Aningaaq: https://www.ia.gl
Email: ia@ia.gl