Ulluni augustip 8.-nit 10.-nut 2014 Qeqertarsuup Tunuani Inuit Ataqatigiit aasaanerani katersuupput qulequtaralugu ”Qaasuitsup Kommuneani inoqarfiit minnerit oqartussaaqataanerat nukittorsarneqarli”.

Inuit  Ataqatigiit Kattuffiata Siulittaasua Sara Olsvig, Inuit Ataqatigiit Qaasuitsup Kommuneani ilaasortaatitai Ane Hansen aamma Peter Olsen Nunaqarfinnilu Aqutsisutut ilaasortat Gerth Nielsen aamma Lars Olsen peqataapput qinikkatullu suliaminnik saqqummiussaqarlutik.

9. august tassaavoq Naalagaaffiit Peqatigiit Nunat Inoqqaavinut Ullorititaa taannalu iluatsillugu ICC-p Kalaallit Nunaanni Siulittaasortaava Hjalmar Dahl qaaqqusatut peqataavoq oqalugiartinneqarlunilu.

Katerisimaarnermi peqataasut oqallinneranni kommunet kattunnerisa kingorna Nunaqarfinni Aqutsisut suliassamittut pisinnaatitaaffiisa annikippallaamik atuutsinneqarnerat  oqartussaaqataanerisalu sunniuteqarsinnaanerallu annikillerujussuarnerat qitiutinneqarpoq.

Ataatsimeeqataasut kissaatigaat Qaasuitsup Kommuneani qulaaninngaaniit aqutsineq annikillineqassasoq oqartussaaqataanerlu inoqarfinnut siammarneqassasoq, soorlu aamma inuttaasunik peqataatitsineq nukittorsarneqarnissaa piumasarineqarluni.

Katerisimaarnermi peqataasut sakkortuumik piumasaraat Nunaqarfinni Aqutsisut akisussaaffeqarnerullutik  aqutsilernissaat anguniartariaqartoq. Qaasuitsup Kommuneani Nunaqarfinni Aqutsisut aqutassaqaratillu aqutsisutut taaguuteqarsinnaangillat.

Allaat Qaasuitsup Kommuneani Nunaqarfinni Aqutsisut ataatsimiissutaasa allattorsimaffii kommunalbestyrelsimi ilaasortanut apuunneqartarsimanngitsut oqaatigineqartoq, inuit oqartussaaqataanerannut akerliulluinnartoq naqissuserneqarpoq. Aqutsineq annerusoq nunaqarfinniittariaqarpoq.

Qinikkanit suliareqqullugit immikkullu siuarsarneqaqqullugit piviusunngorteqqullugillu kissaatigisat ilaatigut tassaapput:

* Inoqarfinni ataasiakkaani inuit atugarisaat aallaavigalugit Qaasuitsup Kommunea ersarissunik periusissiortariaqartoq (handlingsplan). Tamanna pissaaq Nunaqarfinni Aqutsisut innuttaasullu qanimut peqataanerisigut.

* Nunaqarfiit illoqarfiillu inukitsut nammassinnaasaannik inuussutissarsiornikkut sinaakkusiisoqassasoq, minnerunngitsumik tunisassiorfeqarnikkut illunillu angissutsimikkut tulluartunik peqarnikkut suliffissanik amerlanerusunik pilersitsisoqarniassammat.

* Inuussutissarsiornikkut ineriartortitsisariaqarneq qitiulluinnarmat kissaatigineqarpoq tunisassiornikkut aammalu imermik innaallagissamillu pilersorneqarnikkut ullutsinnut naleqqusaasoqassasoq ilinniartitaanikkullu piukkunnarsaasoqassasoq.

* Inuusuttunik ilinniagaqarnissamut siunnersuineq saqqumilaarnerusariaqarpoq nukittorsarneqartariaqarlunilu. Tamanna Kommunemi pisortat pisussaaffittut isigisariaqaraat naqissuserneqarpoq.

* Isumaqatigiissuteqarnikkut ingerlatsineq aqutsinerlu (Kontraktstyring) Nunaqarfinnik Aqutsisuni kommunenillu suliffeqarfiutaanni tamani pimoorussamik atulersinneqarnissaa qinikkat sulissutigissagaat kaammattuutigineqarpoq.

* Nunaqarfinni Kommunefogedeqarnikkut ajornartorsiutit aaqqinneqartariaqarput. Inoqarfiit tamarmik politeeqarlutilluunniit kommunefogedeqartariaqarput illersorneqarsinnaasunillu tigummigallakkanut isertitsiveqartariaqartut piumasaqaataavoq.

* Illunik aserfallatsaaliinikkut ajornartorsiortoqaqaaq. Tassani INI A/S-ip ajornarsiortitsiuarnera unittariaqartoq sakkortuumik uparuarneqarpoq. Aserfallatsaaliinikkut suliffissat nutaat pilersinneqassapput tamannalu iluatigineqartariaqartoq katerisimaartunit kissaatigineqarpoq.

* Illut inueruttut nunaqarfimmiunut allanit siulliullugit neqeroorutigineqartalernissaat aqqutissiuunneqaqquneqarpoq.

* Nunaqarfinnut illoqarfinnullu inukitsunut suliffissaqartitsiniarnermut sammisaqartitsiniarnermullu immikkut saaffiginnittarfeqarnissaq (Job og aktiveringscenter) pisariaqartinneqarpoq.

* Inuussutissarsiornermut Aningaasaateqarfimmik pilersitsinissaq innersuussutigineqarpoq, taannalu akileraartarnikkut aningaasalersorneqarsinnaasoq isumaqartoqarluni.

* Nunaqarfinni meeqqeriveqarnikkut pissutsit atukkanut naleqqussarnissaat pisariaqartinneqarpoq. Meeqqerivinnut akiliutit illoqarfinni akiliutitut annertussuseqartarnerat uparuarneqarpoq. Akiliutaasartut assigiiginnassappata nunaqarfinni perorsaasutut ilinniarsimasunik sulisut ilaqarnissaat meeqqeriviillu ammasarfiisa assigiinnissaat piumasaqaataasariaqartoq anguniarneqartariaqarpoq.

Naggataatigut isumasioqatigiittut nuna tamakkerlugu kommunet akornanni naligiissaarinermut tunngatillugu akileraarutip assigiittariaqarnera naqissuseqqippaat.

Ukiup tullissaani katerisimaartoqaqqinnissaa aalajangiunneqarpoq. Sumi katerisimaartoqarnissaa Qeqertarsuup Tunuani Inuit Ataqatigeeqarfiit aalajangiiffigissavaat.

Saaffigineqarsinnaasut:

Gerth Nielsen
Akunnaani Inuit Ataqatigiit Siulittaasuat, Nunaqarfinni Aqutsisoq
Mobil: 52 47 04

Ane Hansen
Qaasuitsup Kommuneani Kommunalbestyrelsemut ilaasortaq
Mobil: 58 76 61