Ullumikkut Partii Naleraq kiisalu Inuit Ataqatigiit Aningaasaqarnermut Aatsitassanullu Naalakkersuisumik tatiginnikkunnaarlutik taasisitsipput.

Tatiginnikkunnaarnermut tassititsinitsinnut toqqammaviuvoq Naalakkersuisut akitsuutit pillugit suliaqarnerat torinngilluinnartumik eqqunngitsunillu tunngaveqarlutik suliaqarsimanerat inuiaqatigiinnut akeqarmat.

Akitsuusersuiniarnerit pineqartut ukiarmili naalakkersuisunit saqqummiunneqarmata naalakkersuisooqatigiit akornanni isumaqatigiinnginnerit saqqummeqattaarput. Suleriaaseq naalakkersuilluarumasunut naleqqutinngilluinnartoq atorneqarpoq. Taamatut suliamik ingerlatsineq niuernermik inuussutissarsiortunut nalornititsinermik annertuumik pilersitsisimavoq, maannalu suli atuulluni.

Kukkunerit upernaarmanna torersumik aaqqinneqarsimasinnaagaluarput, takusarpulli allaavoq. Tukattumik paatsoornartumillu ingerlatsineq nangiinnarpoq. Tassami Naalakkersuisut eqqunngitsunik tunngavilersuuteqarnermikkut, naalakkersuisulli namminneq inatsisissap qaqugukkut atuutsilernissaannik ulluliisimanerat inatsisartuniit pisinnaatitsissuteqanngimmat.

Aningaasaqarnermut aatsitassanullu naalakkersuisup sangujoraarneranut isummaminillu allanngortitsisaqattaarnera una takussutissatut assersuutigissavarput:

Aningaasaqarnermut Aatsitassanullu Naalakkersuisoq tusagassiuutini saqqummiivoq 21. marts inatsisip pineqartup allannguutissaanik saqqummiiniarnatik, ullut quliinnaalli qaangiummata mumilluinnarpoq, tassami 31. marts tusagassiutini saqqummerpoq imatullu oqaaseqarluni “…akitsuutinik nutaat allanngortitallu akuersissutigineqarneri niuertunut kingunerisassaanik Naalakkersuisut nalilersuinerinut paasissutissanik kukkusunik tunngavissaqarsimanera Aningaasaqarnermut Aatsitassanullu Naalakkersuisup assut ajuusaarutigalugu nalunaarutigivaa”.

Sukkunut akitsuutit assersuutigissagaanni kialuunniit ilisimavaa akitsuut taanna kioskiutilinnut annertuumik kinguneqartitsissasoq. Naalakkersuisup Akileraartarnermut aqutsisoqarfimmit kukkusumik ilisimatinneqarsimanini taamaammat patsiseriinnarsinnaanngilaa. Naalakkersuisunit eqqarsarluanngitsoortoqarsimasoq erseqqippoq.

Inuit Ataqatigiit piumasaraarput niuernermik inuussutissarsiuteqartut, pingaartumik kioskiutillit aningaasat annaasaat utertinneqassasut Inuit Ataqatigiit kissaatigaarput. Naalakkersuisut kukkunerat namminersortut akilissanngilaat, aamma naalakkersuisut kukkunerat namminersortut niuertut akilissanngilaat.

Inatsisartunik eqqunngitsumik paatsoorneqarsinnaasunillu suliap ingerlanerani paasissutissiisaqattaartoqarpoq, naalakkersuisunullu pineqartunut akisussaaffigineqartariaqarluni. Akisussaaffik atorfilittanut milorujutiinnarneqarsinnaanngilaq. Inuit ataasiakkaat niuertullu aningaasanik ineriartortitsinermikkut periarfissaannik innarliisoq inatsisit malillugit akisussaatinneqartariaqartoq isumaqaratta tatiginninnginnermik taasititsinikkut qulakkeerniarsimavarput.

Inatsisit tunngavigalugit Inuit Ataqatigiit Aningaasaqarnermut Aatsitassanullu Naalakkersuisup tatigiunnaarlugu taasivugut.

 

Aqqaluaq B. Egede

Inuit Ataqatigiit