Akisussaaqatigiippugut

All. Sofia Geisler, Inuit Ataqatigiit Inatsisartuni

Kisitsisit naqissusiisut paatsoorneqarsinnaanngitsut uppernarsaapput Naalakkersuisoqarfinni taakkulu ataanni susassaqarfinni aalajaatsumik sulisoqarniarneq anguniassallugu aqqut suli takkajaajusoq. 

Qaffasissumik ilinniagaqarsimasut akademikerit agguaqatigiissillugu ukiut 2,6 kiisalu akademikeriunngitsut agguaqatigiissillugu ukiut 3,1 Namminersorlutik Oqartussani sulisorineqartarnerat sivisoorsuartut taaneqarsinnaanngilaq.

Nunami maani innuttaasugut 56.000-it missaanniippugut. Taamaakkaluartoq akileraartartuusugut ukiut tamaasa akilersueqataavugut millionilikkaanik pisattat nassiussuunneqarnerinut atukkanut. 2018-i tikillugu ukiuni tallimani katillugu atorneqarput 4.288.000 kroner, ukiorlu taanna aamma atorneqarput koruunit millionit tikingajallugit atorfinikkiartorluni soraarnermullu atatillugu angalanernut.  
(Takuuk §37 naapertorlugu apeqqut: https://ina.gl/documents/para3637/2019/svar/153_2019_personaleomsaetning_SOGEI_akissut.pdf )

Aningaasarparujussuit, inuiaqatigiit aningaasaateqarnerulernerannik malitseqanngitsut, allani atorneqarsinnaagaluartut. Sipaarneqarlutilluunniit.

Apeqqutiginngitsoorneqarsinnaanngitsoq tassaavoq sulisut taama taarseraatsiginerannut suna pissutaanersoq, aammalu sulisorisat suminngaaneeraluarpataluunniit sulisussarsiarinissaannut, sulisoriinnarnissaannut piginnaanngorsarnissaannullu Naalakkersuisoqarfiit naammattumik iliuuseqarnersut. Naalakkersuisoqarfiit suliassaqarput malitseqartittariaqakkamik.

Allaffissornerujussuaq

Apeqqut alla tassaavoq allaffissornissaarsuarmik aalajangersaanernillu immitsinnut ipitikkiartunnginnersugut.

Meeqqat atuarfiisa aqunneqarnerat kommunenut suliassanngorteriarlugu Naalakkersuisoqarfiup susassaqartup ataani pilersipparput Ilinniagaqarnermut Aqutsisoqarfik.

Isumaginninnermut tunngasut isumagineqarnerat annerpaat kommunenut suliassanngorteriarlugu Naalakkersuisoqarfiup ataani pilersipparput Isumaginninnermut Aqutsisoqarfik. Peqqinnissamut Naalakkersuisoqarfiup ataaniippoq Peqqinnissamut Pitsaaliuinermullu Aqutsisoqarfik.

Kommunenut isumagisassanngortitseriarluta pinerit tamaasa suliassaqarfik pillugu Naalakkersuisoqarfiup ataani Aqutsisoqarfimmik pilersitsisarnissaq siunertaraarput aamma siunertaraarput Naalakkersuisoqarfik tamarmik Aqutsisoqarfeqassasut?

Illuatungaani nalunngisarput nunatsinneersut avataaneersullu suliffeqarfiik Namminersorlutik Oqartussanut saaffiginninniarnerminni aporfigisartagaat ikittuunngitsut suleriarnissamik kingaallassaasutut misigineqartuartut. Taamatut inissisimalersimanitsinnut Inatsisartut aamma Naalakkersuisut akisussaaqatigiipput. Taamaattumik Inatsisartut Naalakkersuisullu aamma akisussaaqatigiipput Namminersorlutik Oqartussani sulisut paarlakaannerujussuisa malitsigisaannik aningaasarpassuit atorneqartarnerat allanngortissallugu aqqutissanik nassaaqatigiinniarnissaminnut.