Akisussaaffik kommuuniniiginnarli

Kommuunit sapinngisartik naapertorlugu, minnerunngitsumik sulisut pigisatik aallaavigalugit sulipput. Assaat kissalaartut amigaatigineqarput.

Isumaginninnikkut akisussaaffik Naalakkersuisoqarfimmut nuutsinneqassagaluarpat qitiusumi allaffissornikkut annertuumik pilersitsineruinnassaaq, maannakkullu ikiortarialinnut iluaqutaanaviarnani kinguarsaataannaassaaq.

Inuit Ataqatigiinni kaammatuutigerusupparput piaartumik Naalakkersuisut kommuunillu oqaloqatigeeqqullugit, ukiunullu arlalinnut atuuttussamik pilersaarusioqatigeeqqullugit. Tassanilu iliuusissat kommuunit qanimut peqatigilluinnarlugit ilusilersorneqartariaqarput, Qallunaat Nunaanniit ikiortissarsiornermi piginnaasat ikiuutaasinnaasullu sorliit qanorlu annertutigisut  pisariaqarnersut qulaajaavigeqqullugit. Ukioq meeqqat ukiuattut Naalakkersuisut Siulittaasuata suaarutigisaa oqaasiinnartigut pinnani timitaliinertalimmik piviusorsiortumillu piviusunngortinneqartariaqarpoq.

Aammattaaq pinngitsuuisinnaajunnaarnermik katsorsaanermut tunngatillugu  nunatsinni katsorsaasuvut atorluartariaqarput, taakkumi misilittagaqarluareermata.

Minnerunngitsumik Nunatsinni  assigiinngitsunik tarnikkut katsorsaanermik ilisimasalittavut, kommuuniniippata, namminersortuuppatalu atorluarlugit ataqatigiissumillu pilersaarusiornermi peqataatillugit.

Kommuunit sullissassat sumiinnersut suliassallu suuneri ilisimaareqqissaarpaat, pitsaasumillu angusaqartoqassappat qitiusumit  ataqatigiisaarilluarnikkut taakku pitsaanerpaamik ikiorserneqarsinnaapput.

Stine Egede, Aqqa Samuelsen aamma Mikivsuk Thomassen Inuit Ataqatigiit – Ilaqutariinnermi, Peqqissutsimullu Ataatimiititaliami ilaasortat.