All.: Sofia Geisler – Aqqa Samuelsen, Inuit Ataqatigiit Inatsisartuni

Ajornartorsiut ilisimasarput, ammasumik eqqartortariaqagarput

Nuna tamakkerlugu ineqarfiit 5.240-it kuutsittakkanik anartarfeqanngillat, taamaattumillu puussiat ingittakkat atorneqarlutik. Taamaammat sumi tamani takusinnaavagut puussiarpassuit, qernertut, sungaartut allamilluunniit qalipaatillit inoqarfiit iluini inissinneqarsimasut, imaalu qanoq iliussallugit nalusagut. Imaanut ingiinnarsimanngikkutsigit.

Nunatsinni inoqarfinni ataasiinnarmiluunniit kuuffitsigut ingitagut minguiarneqarneq ajorput, taamaasilluni angerlarsimaffinniit suliffeqarfinniillu ingitagut suulluunniit aamma kemikalianik imallit avatangiisitsinnut ingerlatiinnartarpagut.

Illoqarfinni nunaqarfinnilu eqqakkat qaleriiaakkaluttuinnartut takusinnaavarput.

Aarhus Universitetip issittumi ilisimatusarneq pillugu immikkoortortaata 2018-imi saqqummiuppaa 2000-miit 2016-imut misissuinerit takutikkaat Kitaani sinerissami nassaarineqartut plastikkit 80 procentii tassaasut eqqakkat Nunatsinniit eqqakkavut. 

Pissutsit taamaapput.

Pissutsit aamma tassaapput ukiorpassuit ingerlaneranni suliniutit amerlasuut assigiinngitsunit akisussaaffigineqartut aallartisarneqartarsimammata, ajunngitsumik siunertaqartumik eqqakkanik suliaqarnissamik siunertaqartut. Ajoraluartumilli sinerissami sumi tamani takusinnaasatsitut amerlasuutigut siunertaq naapertorlugu naammassineqanngitsoortarsimasut.

Avatangiisinut Pinngortitamullu Naalakkersuisoq sassartariaqarpoq

Eqqakkat qanoq pinissaannik ajornartorsiuteqarneq Nunatsinni kisimi ajornartorsiutaanngilaq. Aamma taamaappoq nunarpassuarni avatitsinniittuni. Eqqakkat qanoq iliuuseqarfiginissaanut tunngasoq Naalagaaffiit Peqatigiit nunarsuaq tamaat pillugu iliuusissatut anguniagaanni 17-ini aamma ilaavoq, anguniakkallu taakku aamma Nunatsinnut tunngapput.

Eqqakkat ajornartorsiutaajartuinnarnerat pillugu iliuusissanik ullumernit ersarinnerusumik ataavartumik Naalakkersuisuniit ukkatarinninnissaq Inuit Ataqatigiinniit kaammattuutigissavarput. Akisussaaffik eqqakkanut tunngasoq kommunenulluunniit tunniunneqarsimagaluarpalluunniit. Uanimi pineqarpoq aamma Nunatta avammut kiinnernera.

Eqqakkat sinerissami qaleriiaakkiartuinnartut pillugit akisussaaqataasut assigiinngitsut peqatigalugit attanneqarsinnaasumik aaqqiissutissamik tikkuussisumik pilersaaruteqarnerat pillugu Naalakkersuisut tusarfiginissaat qilanaarivarput.

Inuit nammineq pilersitatsinnik eqqakkat pillugit iliuuserineqartussat siunissamut attanneqarsinnaasumik aaqqiissutaasinnaasunik suleqataanissamut Inuit Ataqatigiinniit tapersersuiuassaagut.

Tikkuarusutarput tassaavoq maannakkut aalajangiiffigineqarluni iliuuseqarfigineqalereersinnaasoq, tassalu ataasiartumik atortakkat plastikkinik sanaat Nunatsinnut eqqunneqarsinnaajunnaarnerannik atoqqusaajunnaarnissaannillu iliuuseqarsinnaaneq. Piaartumik aaqqiiffigisassatta ilagaat anartarfiit puui suneqaratik maanna inoqarfippassuarni sumi tamaaniittut. Minnerunngitsumik piaartumik ukkatarisassarput tassaavoq kuutsitatsinnik saliivinnik inoqarfinni pilersitsinissarput.

Inuulluaqqusilluta

Sofia Geisler

Avatangiisinut Ataatsimiititaliaq, Nunat Avannarliit Siunnersuisoqatigiiffiat

Aqqa Samuelsen

Eqqissisimatitsinermut Avatangiisinullu Ataatsimiititaliaq, Inatsisartut