Inuit Ataqatigiinni Kommune Kujallermi Greenland Minerals Kuannersuarni aatsitassarsiorniarnera akuerinngilarput. Naalakkersuisunit oqariartuutigineqarpoq Kommunep aningaasaqarneranut iluaqutaassasoq, soorunalumi tamanna piffissami aatsitassarsiornerup nalaani pissasoq ilisimavarput. Aatsitassat qaqutigoortut uranitallit nuna allamiut piiarlugit naammatsippassuk kommunetsinnut aningaasat isersimasut qaqugumulluunniit akilersinnaanngisaannassavaat nunap inuisa annaasaat.

Aatsitassarsiortoqalerpat inuit kommunetsinni nunaqavissut minnerunngitsumik illoqarfimmi Narsami nunaqartut amerlaqisut annaasussaavagut, savaateqarneq annertuumik innarlerneqartussaavoq, Narsap qanittuani aalisarneq innarlerneqartussaavoq. Taakkuuppullu nunamut illoqarfimmullu uummateqarlutik inooqataasut pilersueqataasullu. Taakku nunami allamiut aningaasarsiorluarniassammata kommunelu akileraarutitigut isertitaqarnerulerniassammat pilliutiginiarneqarput. Pilliutiginiarneqarput kalaallit namminneq ukiuni 100-likkaani inuuniutaat, kinguaariit kingornuttagaat. Pilliutiginiarneqarput nunap inuisa peqqissusaat, nunap inuisa pinngortitamik inuuniuteqarlutik atuisuunerat, annertunerpaamillu pilliutiginiarneqarput kinguaatta kingornutassaat. Tamakku tamarmik pilliutiginiarneqarput ukiualuit nuna allamiut aningaasarsiorluartinniaannarlugit.

Nunap inui aperineqarpat? Nunap inui eqqarsaatigineqarpat? Nunap inui salliutinneqarpat? NAAMIK!

Kommunetsinni ataatsimoorluta immitsinnut illersorniarta, aningaasallu isertussat nunatsinnut tamakkiisumik isertitassaasut ujartorniartigit. Aningaasanik nunatsinnit annissuineq killilinngisaannassavarput avataaniit nunarput aningaasarsioriartorfigissallugu taamak ajornaatitigissappat.

Maanna akuersissummut qanillattorlutik suliaqartut unitsinneqassappata inuiaqatigiit iliuuseqartariaqarpugut, oqartussaaqataatinneqarniarta, aperineqarniarta inuiaqatigiinnuna uagut nuna manna tummisarput qanoq atussallugu akisussaaffigisassarigipput.  

Ukiut kingulliit makku nunatta kujataani takornariaqarnikkut annertuumik siuarsaaneq aallartinneqartoq tassaavoq aningaasarsiorfissaq aatsitassarsiornissanit pingaaruteqarnerujussuusoq. Takornariaqarneq aningaasanik annissuiffiunani aningaasanik isaaviussammat, qaqugorsuarmut ineriartortinneqarsinnaasoq, kinguaariit kingornuttagarisinnaasaat, namminerlu nunaqavissutut aqussinnaasarput, kikkullu tamarmik piumagunik atorluarsinnaasaat.

Naja Lund, Inuit Ataqatigiit Kommune Kujalleq