Allattoq: Aqqa Samuelsen, Isumaginninnermut meeqqallu pillugit oqaaseqartartoq

Aasiaat ernisarfiunissaa qulakkeerneqarli

Aasiaat ernisarfiujunnaartussanngorneranut Ernisussiortut Peqatigiiffiat ernumanartoqartitsilluni tusagassiutitigut oqariartuutaa paasilluarsinnaavarput isumaqatigilluinnarlutigulu.

Aasianni ernisarfik juulip aallaqqaataani siullermik ukiumi ataatsimi matuneqassaaq. Tamanna uggornarpoq pissusissamisoorsorinngilarpullu.

Aasianni ernisarfik matuneqarpat Kommune Qeqertalimmi innuttaasunut, ilaqutariinnut, angajoqqaanngortussanut meeqqamullu inunngortussamut eqquinerlussaaq.

Ilaqutariit angajoqqaanngortussallu toqqissisimanartumik atugassaqartinneqarlutik taavalu meeqqap inunngorneraniit aallartilluarnissaa Inuit Ataqatigiit pingaartippaat.

Aasiaat ernisarfiujunnaarneratigut angajoqqaanngortussat amerlanerit najugarisartik qimallugu erniartortariaqartassapput. Erniartorluni aallartariaqarnermi nalaarsinerluttoqarsinnaanera meeqqap inunngornermini aallartilluannginneranik kinguneqarsinnaanera aarleqqutigaarput.

Aasiaat ernisarfiujunnaarnera pillugu Naalakkersuisunut akineqartussanngorlugit §37 naapertorlugu apeqquteqaateqarpugut, piumasaralutigulu Naalakkersuisut erseqqissumik nassuiaateqassasut. Apeqqutit akissuteqaataat qilanaarivarput erseqqissumik paasissutissiisoqarnissaa pisariaqarmat.

Ilaqutariinnut angajoqqaanngortussanullu sullissinerup ajorsigaluttuinnannginnissaa anguniarlugu Naalakkersuisut sulissuteqartariaqarput, sapinngisamillu meeqqap inunngorneraniit toqqissisimanartumik inuuneqarnissaanut sinaakkutissat pilersinniarlugit piukkunnaatilinnik sulisussanik pissarsiniarnissamut maannagaaq iliuuseqartariaqarlutik. Ajornartorsiut aaqqiiviginiarlugu Kommune Qeqertalik qanimut suleqatigineqartariaqartoq kaammattuutigissavarput.

Peqqissaavinni sulisussanik pissarsiniartarnermi Nunat Avannarliit aallaavigiinnarnagit, periarfissanik amerlanerusunik Nunani allani ujaasisarnissamut ammanerusariaqartugut isumaqarpugut, Peqqissaavimmi sulisussat amigaatigineqartut pissarsiarinissaat eqqarsaatigalugu.

Aasianni ernisarfik matuneqarpat Nunatsinni ernisarfiit tallimaannanngussapput, tassalu Tasiilami, Qaqortumi, Nuummi, Sisimiuni Ilulissanilu.

Siunissami najugaqarfigisap sapinngisamik qaniginerpaasaani ilaqutariit angajoqqaanngortussallu ernisalernissaat qulakkeerniarlugu Naalakkersuisut anguniagaqartariaqarput pilersaarusiorlutillu.

Peqqissaaviit qitiusumut aaqqissuussiffigineqarnerat nalilersuiffigisariaqalerpoq.