Ajuusaarnartutut isigaaara Avanersuarmi piniartut allamik toqqagassaqaratik inuuniapiloortinneqarnermata. Naalakkersuisut qilalukkanik qernertarnik pisasseeqqissinnaanertik malillugu piaartumik iliuuseqassasut piumasaraara. 

Ilumoorsinnaanngilarmi piniarnikkut  inuussutissarsiuteqartut periarfissaarulluinnartut nunatta siuttuinik iliuuseqarfigineqanngimmat, naak ilisimalereeraluarlugu qilaluarniarneq inuussutissarsiornikkut Avanersuami pingaaruteqarluinnartuusoq.

Aalisarnermut piniarnermullu inuussutissarsiuteqarnerup naligiinnerusumik periarfissaqartitsinissarput soqutigisarisussaavarput. Ilisimassavarsi Massakkut Avanersuarmi piniartut  allanik inuussutissarsiutissaqanngillat, tamannalu piaartummik iliuuseqarfigineqassasoq sakkortuumik piumasaraara. Piniartutut inuussutissarsiuteqartut ilungersuuteqarnerat isiginngitsuusaaginnarneqarsinnaan-ngilaq. Allatuulli ilaquttanut, akiligassanut, inuussutissanut, ikummatissanut angalanermi orsussamut, sakkussanut, qimmillu nerisassaannut assigisaanullu  aningaarsartuuteqartarput. Taakkulu massakkut piniartortatta nammassinnaanngilaat.

Naalakkersuisut saaffigaassi, nunaqqatikka piniartutut inuussutissarsiuteqartut ilungersorlutik massakkut killiffigisaminni, ilaqutariittut imminnut ilungersorlutik pilersortuusut  piniarsinnaajunnaaqqanerat isiginngitsuusaaginnarnagu, Naalakkersuisut piaartumik pitsaanerusumillu aaqqiissuteqaqqullugit iliuusissamik  suliaqarniaritsi.

Avanersuarmi inuussutissarsiutitigut inerisaanissaq nunaqqatigut peqatigalugit ingerlanneqarsinnaalluarpoq. Inuussutissarsiutinik allanik pilersitsinissaq  suleqatigiilluta oqaloqatigiissutiginiartigu. Ukioq kaajallallugu inuussutissarsiutit aaqqissuussaasumik inuuniarnermi nappatigineqarsinnaanissaa siunertaralugu akisussaasut tamarmiullutik issiaqatigiinnissaat siunnersuutigaara. Oqaloqatigiissutissaqarpugut, piareersimavungalu oqaloqataanissamut.

Kiisalu upernaaq kaammattuutiginikuusara Imm. 176 (Qaanaami kulturimik toqqammaveqartumik immikkuullarissumillu piniariaatsit kinguaariinnut aggersunut iluaqutissatut qanoq ililluta tammatsaalineqarnissaannik qulakkeerinnissinaanerput pillugu apeqquteqaat aallaavigalugu oqallinnissamik siunnersuut) inersuarmi oqallisigineqarnikuusoq ilanngullugu misissorneqarnissaa innersuussutigaara.

Mikivsuk Thomassen

Inatsisartuni ilaasortaq, Inuit Ataqatigiit