Siorna avaleraasartuunik pisassiineq inuiaqatigiinni aamma naalakkersuinikkut aalassassutaaqaaq, KNT pillugu soqutigisarsiortoqarnersoq Inatsisartuniit aalisartuniillu apeqquserneqarmat. Taamani pisut ilungersunartut pillugit Inuit Ataqatigiit Inatsisartut Aalisarnermut Piniarnermut nunalerinermullu Ataatsimiititaliaat ilungersunartunit sulianik ingerlatseqataavoq, aamma taamani Kukkunersiuinermut Ataatsimiititaliaq kukkunernik ilungersunartunik saqqummiussivoq. Taamani tusagassiorfinni annertuumik sammineqartut pillugit Naalakkersuisut ima neriorsuipput.

Inatsisartut Aalisarnermut ataatsimiititaliaat neriorsorneqarpoq pisut ilungersunartut kingumut aqqusaarneqaqqinnginniassammata tulliani avaleraasartuunik pisassiisoqalerpat (tassa massakkut pisassiineq) Inatsisartut Aalisarnermut Ataatsimiititaliaat peqataatinneqaqqissaassasoq.

Taamatut neriorsuineq massakkut pisassiisoqarmat minnerpaamilluunniit ataatsimiititaliaq malinnaatinneqanngilaq, ilisimatinneqanngilaq kikkut pisassinniarneqarnersut, imaluunniit nunatta soqutigisaannik ineriartortitsinissamik ataatsimiititaliap piumasaqarnera qulakkeerniarlugu Naalakkersuisut peqataatitsinerunissamik peqquneqarnerat timitalerneqanngilaq.

Taamatut Naalakkersuisut Inatsisartut ataatsimiititaliaani neriorsuilussinnarnerat akuerineqarsinnaanngilaq qoqassinertullu isigineqartariaqarluni. Naalakkersuisut avaleraasartuut pillugit pisassiisarnerminni suna pissutiginerlugu isertuasumik peqataatitsinani tassanngaannaq aalajangiisarnerat eqqumeeqaaq.

Soormi nunatta soqutigisai, soorlu, Nunaqavissut avaleraasartoorniutinik umiarsuaateqalernissaat, aningaasarsiorfeqalernissaat, suliffissaqartitsinissaat, taamatullu avaleraasartoorniarneq tunngavigalugu nunarsuarmioqatitsinnut unammillersinnaassuseqalernissarput sooq suleqatigiilluta ataatsimoorlutalu ilusilersorsinnaanngilagut? Sunaana inuiaqatigiit pingaartitaasa timitalersorneqartariaqartullu ammasumik ataatsimoorussamillu timitalersuiffigineqarnissaaniit pingaarnerusimasoq?

Pisassiissutinik kingusippallaamik agguaassisarneq kinguneqartarpoq avaleraasartuut aalisarneqarnissaannut piffissakilliortitsinikkut pisarineqartartut ikippallaartarnerannut. Taamaattumillu aningaasat isertitassaraluit aamma annaaneqartarlutik. Avaleraasartuunik pisassinneqarnissamik qinnuteqartut akuerineqassagunik piumasaqaatit allanngorartut siuarsaatiginavianngimmassuk, Naalakkersuisut piumasaqaatinik allannguisaqattaarnerat pingaarnertut unitsinneqartariaqarpoq.

Naalakkersuisut sooq aalisarnermut siunnersuisooqatigiit tusarniarsimanngilaat? Sooq aalisarnermut siunnersuisooqatigiit ilaasortaasalu tamakkerlutik peqataatinneqarsimannginnerat qanoq nassuiarsinnaavaat? Ila aqutsineq naalakkersuisullu suleriaasiat allanngorangaarmat kikkut pingaarnerutillugit sulisoqarnersoq apeqqusernarsivippoq.

Inuit Ataqatigiit sinnerlugit kaammattuutigeqqissavarput suleqatigiiffiliortoqassasoq aalajangersaaffiunngitsumik, kisianni inuussutissarsiutip nunatta inuisalu pingaartitaannik, ineriartortikkumasaannik siunertanik Naalakkersuisut Inatsisartullu aammalumi aalisartut ataatsimoorlutik suleqatigiiffigisinnaasaannik. Pisariaqarpoq avissaartuuffiusinnaasut peerlugit ataatsimoorluta suleqatigiinnissarput. Taamatut siunissarput ilusilersorniartigu ataatsimoorluta. Taamaaliorutta annaasassaqanngilagut, taamaaliorutta angusaqassaagut.

Inuit Ataqatigiit

Politikkikkut oqaaseqartartuat

Aqqaluaq B. Egede