Aalisarneq pillugu politikkikkut siammasissumik isumaqatigiissusiortoqarnissaa pisariaqarpoq

Inuit Ataqatigiit isumaqatiginninniarnissamut suleqatigiinnissamullu piareersimagatta aalisarneq pillugu apeqqummi illuatungiliuttoqatigut allat aamma ilaatillugit isumaqatiginniarneqarfigineqarnissarput ujartorpara. Inuit aallartitaattut apeqqummi nunatsinnut aaliangiisuulluinnartumi siammasissumik tunngavilimmik siunnissaq pilersinneqartariaqarpoq. Aalisarneq tamatsinnut tunngavoq, tamatta suleqatigiissutigissavarput.

Aalisarneq pillugu inatsisissamut suliaqartussamik isumalioqatigiisitamik pilersitsinissaq naalakkersuisooqatigiit tapertaasullu akunnerminni isumaqatigiinniassutigisussanngoraat paasivarput.

Aalisarneq nunatsinni inuttut atukkatta aningaasarsiornittalu tunngavigaa, siammasissumillu politikkikkut isumatusaartumik, periarfissiisumik tunngavigissaartumillu aqqutissiuussiffigisariaqarparput.

Tamannalu tunngavigalugu aalisarneq pillugu sulinissami partiit akornanni siammasissumik isumaqatigiissusiorsinnaaneq qitiulluinnartoq oqaatigisariaqarpara.

Aalisarnikkut piorsaaneq siunissaq isigalugu tamatsinnut pitsaasumik sunniuteqarnissaa qulakkeerumallugu qinigaaffiit akimorlugit kikkullu naalakkersuinikkut siuttuunerat apeqqutaatinnagu, politikki attanneqarsinnaasoq suliarisariaqarparput.

Naalakersuisoqatigiit tapertaasalu isumaqatigiissutissartik qulakkernissaa kisiat suliarinagu ammasumik partiinik, susassaqartunik innuttaasunillu suliap aallaqqaataaniilli peqataatitsillutik suleqatiserinnillutillu ingerlatsinissaannik kaammattuivunga. Pisuussutivut ataasimoorluta pigisavut aporaassutaasussamik isumaqatigiissusorfiussannngillat, akerlianilli isumatusaartumik siammasissumillu isumaqatigiissusiorfiusariaqarput.

Múte Bourup Egede

Siulittaasoq

Inuit Ataqatigiit