Aalisarneq pillugu inatsisissaq Siumup qineqqusaarutigiinnarsimavaa

Aalisarneq pillugu inatsisissaq naalakkersuinikkut suliassatut pingaarutilittut tamanit qineqqusaarutaavoq. Qinersineq pereerpoq, naalakkersuinikkut sulineq aallarluareerpoq, sulilu aalisarneq pillugu inatsisissaq naalakersuisunit taakkualu tapersersortaanit suliassaq pillugu erseqqissumik nipimik tutsiuttoqanngilaq. Tamannamita sumik patsiseqarsimanermat naalakkersuinikkut suliassaq annertooq tamanit nalornissutaalerpoq.

Naalakkersuisut aalisarneq pillugu inatsisissaq qanoq piniarpaat? Sineriammi aalisartorpassuit inuussutissarsiutertik pillugu qanoq piareersaateqassappat, taakkualu siunissaat Naalakkersuisuniit erseqqissumik qanoq samminiarneqarpat? Aalisarnermik inuussutissarsiut nunatsinni aningaasarsiornermut, suliffissaqartitsinermut inuillu atugarissaarnerannut annertuumik tunngavigisarput nalorninaatsumik peqqissaartumik piffissaqarfigilluarlugu suliarineqassappat, tusarniaanerit annertuut susassaqartunik tamanik akuutitsinikkut ingerlanneqartariaqarput.

Suliassaq annertooq ukiuni arlaqalersuni paamaarunneqarluni erseqqissuliorfigineqarnanilu oqallisiginaveersaarneqartoq pillugu, Naalakkersuisut erseqqissumik oqaaseqarfigisariaqalerpaat. Siumut naalakkersuinikkut siuuttuusoq aamma Aalisarnermut Piniarnermullu Naalakkersuisoqarfimmi naalakkersuisuutitaqartoq apeqqut pillugu suliassaminik qanoq ingerlatsiva? Ukiut ingerlalertorput iliuuseqarnissamik oqalunneq nutaajujunnaareerpoq. Suliassaq annertooq pillugu Naalakkersuisut sunamita pissutigalugu inatsisissaq saqqummiunneq ajorpaat?

Inuit Ataqatigiinniit Aalisarneq pillugu inatsisissaq malinnaavigeqqissaarlugulu peqqissaarussamik suliaanissaanik qulaajaanerit timitaliiffiginiarsimavagut. Suliassallu nanginneqarnissaa utaqqivarput, Aalisarneq pillugu inatsisissaq Naalakkersuisut aatsaat saqqummiuppassuk sulineq aallarteqqissinnaammat. Aalisarluartut aningaasarsiornikkut nunatta inuisalu aningaasarsiornermikkut tunngavigisaat innarlerneqannginnissaat pingaaruteqarpoq. Suliassap pipallatamik suliarineqannginnissaanut pisussaaffiliisumik tamanna malitseqartariaqarmat, paasissutissanik Inuit Ataqatigiit ujartuivugut.

Suleriaaseq malillugu §37 naapertorlugu Naalakkersuisunut apeqqutit ingerlatittarpagut. Ulloq manna tikillugu erseqqissumik Naalakkersuisut akissuteqanngillat, Aalisarneq pillugu inatisissaq qaqugu aamma qanoq suleriaaseqarluni, susassaqartullu tamarmik peqataaffigisaannik ingerlanniarneritsik erseqqissuliortoqanngilaq. Inuppassuit suliassaq pillugu ujaartuinerat Inuit Ataqatigiinniit tusaavarput, paasilluarlutigulu ujartuinerat. Minnerpaamik Aalisarnermut Naalakkersuisoq imaluunniit Naalakkersuisut Siulittaasuata apeqqut annertooq pillugu oqaaseqarnissaat, Inuit Ataqatigiinniit pisariaqartutut isigaarput.

Oqareernitsituut suliassaq annertoqaaq. Suliassaq inuiaqatigiinni ineriartornitsinnut sunut tamanut attuisinnaassuseqartuummat. Inuussutissarsiornikkullu patajaatsumik aalisartut ingerlatsinerat attanneqassappat, pipallataanngitsumik piffissaqarluarluni akuutitsilluarlunilu sulisoqartariaqarpoq. Massakkulli aalisartut ilaat inerisaaniarlutik siunissami qanoq inatsisissap sunniuteqarsinnaanera nalorninartoq aningaasaliinissaminnut unittooqqaffigaat. Taamatut inissisimasunut Naalakkersuisut erseqqinnerusumik tikkuussisimannginnerat, inatsisissallu suliarinissaa pillugu piffissalersuisimannginnerat asut aporfiulersimasoq ernumanartortaqarpoq.

Inuit Ataqatigiit sinnerlugit piumasaraarput Naalakkersuisut suleqataasalu qaqugukkut suliassamik aallartitsiniarnertik erseqqissumik paasissutissiissutigissagaat. Naalakkersuisoqarfinnut apeqquteqaaterpassuit ataasiakkaarlugit akisaqattaarneqarput, erseqqissumillu oqaatigisinnaanagu qaqugu inatsisissaq sammineqarniarnersoq imaluunniit unitsiinnarneqarsimanersoq. Nalornisitsineq tamaanga killeqarniarli. Naalakkersuisut akisussaaffimminnik erseqqissumik tikkuussisarlutik, aqutsilerniarlik. Neriuinnassaagut piaartumik Aalisarneq pillugu Inatsisissaq Naalakkersuisuniit erseqqissuliorfigineqassasoq, inuiaqatigiinni nalornisitsineq apeqquterpassuarnik pilersitsisoq aaqqiivigineqaqqullugu.

Inuit Ataqatigiit

Politikkikkut Oqaaseqartartuat

Aqqaluaq B. Egede