Inuit Ataqatigiit Inatsisartuni oqaluuserisassani immikkoortoq 23-mut, inatsit ilaatigut aalisakkanut ikerinnarsiortunut akitsuuseeqqinnissamut tunngasumut, Naalakkersuisut akitsuusiinerussallutik siunertaannut ullumikkut tallimanngorneq apriilip 15-ni siullermeerneqartumut taama isikkoqartillugu akerliuvugut.

Aalisakkanut akitsuutit pisuussutittalu inuiaqatigiittut isertitsiffiginissaat akerlerinngilarput kisianni sakkortuumik inassutigissavarput akitsuusersuinerit eqqarsaatigilluagaallutillu peqqissaartumik suliarineqartassammata.

Ukiuni kingullerni arlaleriarluta takuarput suliaq torersumik suliarineqanngimmat aningaasat isertitassaasutullu missingiunneqarsimasut isertinneqanngitsoortartut. Allaat akitsuusersuiniarnerit ilaat aningaasanut inatsimmut kusassaataannartut taaneqarsinnaasutut isigaavut.

Ukiumi 2015-mi assersuutigalugu tunup avataani avaleraasartoorniarnermit 81 mio.kr.-nik isertitassaagaluit angunagit 28,7 mio.kr-nit taamaallaat isertinneqarsimasut Aningaasaqarnermut Naalakkersuisoq ippassaq inersuarmi ilassutit aningaasaliissutitut inatsisissaq pillugu oqallisiginerani nalunaarpoq. Isertitassatut taggiussimasat angunngitsoorneri tukattumik eqqarsaatigilluagaanngitsumillu ingerlatsisimanermik takussutissiivoq. Inuit Ataqatigiinnit suleriaatsit aaqqinneqarnissaat sakkortuumik inassutigeqqissavarput.

Apeqquserparput Naalakkersuisut suleqatigiissitanik aalisakkanut akitsuusersuinissamik suliaqartussanik, inuussutissarsiortunit aalisartunillu peqataaffigineqartumik pilersitsinikuullutik taassuma suliaasa naammassinneqanngitsoq suli suliaq inersuarmi suliaritimmassuk. Suleqatigiissitat pilersinneqarsumasut suliassartik naammassereerpaat? Peqataatitsineq siunertaasimappat suleqatigiissitallu suliassai ataqqineqartussaasimappat suliaasa naammassineqarnissaat utaqqeqqaarneqartariaqaraluarput.

Aalisarnermit akitsuusersuinerit ukiuni makkunani annertuumik ingerlanneqarput. Tupigaarput aalisartut taama annertutigisumik aallerfigineqarniarnerat annertunerusumik apeqquserneqanngimmat. Uani 1,9 mio.kr.-nit inuussutissarsiornermut allagartamut 1500kr-liinernit nunatta karsianut isertitassaagaluit annertuumik nipituuliuutigineqartarsimasut qaangerujussuarlugit akitsuusersuiniartoqarpoq suliaq taamungaannaq ingerlallugu. Siunnersuummi matumani aaneqarniartut 18 mio. kr.-niupput.

Aqqaluaq B. Egede

Inuit Ataqatigiit