Aaja Chemnitz Larsen: Ilaqutariit avissaartuunneqarnatik atatiinnarneqassapput

Nunatsinnit nuuttarnerit unammillernartitatta annersaat ilaanniipput. Inuit amerlasuut innarluutilimmik imaluunniit nappaatilimmik meeraqartillutik nunatsinni ikiorneqarnissamut periarfissakinneq peqqutigalugu nuuttariaqartutut misigisarput. Taamatut inissisimaneq ilaqutariippassuarnut avissaartuussinermik kinguneqartarpoq, Aaja Chemnitz Larseni, Inuit Ataqatigiinnit, FN-ip nunat assigiinngitsut akornanni ilaqutariinnut ulloqartitsineranni oqarpoq.

2016-imiilli nuuttartut amerlassusaat malunnartumik annikillinikuupput. Tamanna Aaja Chemnitz Larsenip nuannaarutigivaa isumaqarami nuunnerit piareersarluagaallutillu nammineq aaliangiussassaasassasut. Kalaallit Nunaannit nuunnerit innuttaasutut ikiorneqarnissamut pisariaqartitsinermut pisinnaannginnermit tunuliaquteqartussaanngillat.

“Ineriartorneq ajunngitsoq takussaasoq paarilluarnissaa pingaaruteqarpoq. Inooqatigiit akornanni, ilinniarnerup- peqqinnissaqarfiullu tungaatigut pitsanngorsaanissamut oqaasinnguisarnerput pitsanngorsaaniarnerpullu ingerlatiinnartariaqarparput nuuttarnerit amerleqqinnginnissaat piniarlugu. Naalagaaffeqatigiinni nammineq najugaqarfigerusutaq najugaqarfigineqarsinnaavoq. Taamaattorli inuk kinaluunniit nunaminit nuuttariaqartutut misigisussaanngilaq”, Aaja Chemnitz Larseni oqarpoq.

Nuuttarnernut peqqutaasut annerit ilaanniipput atorfilittut utoqqalinersiassaqarnerit. Utoqqalinersiutit Kalaallit Nunaanni katersorneqartarput Danmarkimilu marloriaatinngorlutik pineqartarlutik tamannalu utoqqalinersianik pisartunut amerlasuunut nuunnermut peqqutaasarlutik. Tamanna Kalaallit Nunaanni ataatsimut isigalugu akissarsiat annertussusaannik qaffaanermit taamaallaat allanngortinneqarsinnaavoq.

Aajap maluginiarpaa: “Utoqqaat arlallit Danmarkimut nuuttarput meeqqatik ernuttatillu Kalaallit Nunaanniittut qimallugit. Taamaaliornermi ilaqutariippassuit avissaartuutilertarput tamannalu nunatsinni politikkikkut ukkatarineqarnerusariaqaraluarpoq aningaasaqarnermik peqquteqarluni ilaquttat qimallugit nuuttoqartarnissaa pinngitsoortinniarlugu”.

Ukiuni amerlasuuni kingullerni nuuttarnerit 3-400-nik ukiut tamaasa amerlassuseqartarput. 2019-imi Kalaallit Nunaanni Naatsorsueqqissaartarfimmit kisitsisit malillugit 94-it nuussimapput 2016-imiilli annikilliartornikuullutik.