Soorunami paasisinnaavarput Naleqqakkut kalaallisuinnaq inatsisartuni oqalutitserusullutik kissaateqarnerat kisianni.
Suli inuusugut arlaqarpugut nalitsinni meeqqat atuarfianni atuartitaanikkut kalaallit qallunaallu immikkoortillugit atuartinneqartartunik. Taamaanna pisortat taamanikkut aaqqissuusaraat, qujanartumilli kingusinnerusukkut allanngortinneqarpoq. Taamaammat tupinnartuliaanngilaq nunatsinni suli nunaqqatigut arlaqarmata qallunaatuinnaq oqalutunik, namminnerlu kalaalliullutik misigisimasunik, minnerunngitsumik nunatsinni napatitseqataallutillu, ineriartortseqataallutillu suleqataasunik.
Qanorluunniit Inatsisartuni kalaallisuinnaq oqalunnissamik piumasaqaraluarutta pinngitsoorata oqalutsit sullarissut ullumikkullu pigisagut pisariaqartippagut, atorfilittarpassuimmi suli nunatta avataanniit tikisittariaqartarpagut, nunatsinni politikkikkut ingerlatsinermi kalaallisut oqaasillit inatsisilerinermilu ilinniagaqarsimasut amigaatigilluinnarpagut.
Tusaqqusaarnerli atorluarumagaanni periarfissat eqqartorluarneqanngitsut saqqummiunneqarsinnaasarput, siunnersuutigineqartoq akuerissagutigu atorfilittat qassit soraarsinneqassappat? Nunatsinni oqaativut atorlugit oqalussinnaallutillu allassinnaasut qanoq amerlatigisut atorfinnut pineqartunut sulilissallutik ilinniakkaminnik naammassinnissimasut amerlassutsimikkut naammattut pigaagut? Taakkulu sullisserusullutik piareersimappat.
Nunarput nammiliivissaaq tassungalu piniarnitsinni ullumikkut atugarissaarnikkut atugassarititaasunik taaneqartartunit innuttaasut eqqornerlunneqannginnissaat pisariaqarluinnartuuvoq, namminiilivinnissatsinnilu pisariaqarluinnartut ilagaat allamiut oqaasiinnik atuisinnaasut pisariaqartilluinnarpagut.
Inatsisartunilu qinikkatut sulinermi tassaajuassaaq inuiaqatigiit qinigaasa sulinerat, inuiaqatigiit tamat oqartussaaqataanerat killilersorneqalissappat uggornartorujussuusaaq. Inatsiseqarpugummi nunatsinni atuuttunik taakku tamat oqartussaaqataannerannik tunngaveqarlutik sanaajupput.
Maluginiagarput tassaavoq Pele Brobergip periusitoqariligaa tassaavoq avissaartuunissamik aaqqiagiinnginnermillu pilersitsinissaq, oqaatsitta, inooriaatsitinnulluunniit tunngasumik pitsaanerusumik inissisimanerulernissamut imaqanngitsoq. Nammilersulissagutta pisariaqartitarput tassaavoq Kalaallit nunatsinni najugallit tamarmiulluta ataatsimoornissarput. Uagut inuiaqatigiit atugaannik iluaqutaasinnaasunik tigussaasunik pilersitsinissaq anguniagaraarput, avissaartuunissamik ujartuinngilagut.
Nunarujussuatsinni inuttunngeqisumi assigiinngisitaarput piginnaasaqassuserput iluaqutigisussaavarput imaanngitsoq inuiaqatigiit immikkoortitserlugit inissitsitissagigut tamatta inissaqarpugut aamma ataqqeqatigiissumik ingerlatsineq pisariaqartuassaaq. Pisariaqanngitsumik avissaartuutitsineq politikkerit anguniagassarinngilaat. Tamatta nunaqqatigiit immitsinnut pisariaqartippugut.
Mariane Paviasen Jensen
Inuit Ataqatigiit inatsisartuni politikikkut oqaaseqartartuat.