Nassuiaat

Kujataani Demokraatit siuttuat, Magrethe Thourup Andersen inuit attaveqaqatigiittarfiat aqqutigalugu Kommune Kujallermi borgmesteri Stine Egede-mit aqutsinerlunneraanera aammalu aaqqiissutissanik suleqataajunnaarsimanerarlutik oqaluttoq, illua’ tungilerneqartariaqarmat matumuuna uaguttaaq misigisimavugut, innuttaasut eqqortumik paasitikkusullugit nassuiaateqalaarniarluta.

Aap Kommune Kujallermi akileraarutinik 40 mio. kr.-inik akiliingitsoorsimavoq. Tamanna aamma innuttaaqataasut tamarmik ilisimalereerpaat. Ataatsimiinermi taamani aalajangerneqarpoq misissuinerit ingerlanneqassasut soorlu aamma borgmesteri innuttaqativut tikillugit nassuiaateqariartorumaartoq. Tamanna sap.ak. 34-imi ingerlanneqassaaq.

Ataatsimiinermilu Demokraatit borgmesterimik tatiginnikkunnaarlutik tunuarnissaanik piumasaqarmata taasititsineq ingerlanneqarpoq. Amerlanerussutillit tamanna pinngitsoortippaat torrallassimanngisagut aaqiissuteqarfiginiarlugit sulissagatta, qimarratiginninnata, pisuutitsiniaanarnatalu. Tassa akisussaaffimmik tigusineq, qimarratiginninnginneq.

Killormut Demokraatit piumasatit piviusunngunngimmat, suleqatigiinermiit tunuarput. Tassa aatsaat akisussaafimminnik qimarratiginninnermik taasariallit.

Assatit isaatinngilaat. Tatiginnikkunnaarnermillu oqariartuuteqarput ila qanoq paasissavagut?

Massakkut inuit attaveqaqatigiittarfiat aqqutigalugu Kommune Kujallermi ataatsimiitarnitsinni aningaasaqarnitsinni saqqummiunneqartatut tamattaalluta taaseqataafigisartakkagut qimarratigalugu, akerlianik pissusilersornerat isumaqarpugut kasananngilluinnaqqissaartoq. Tamattaalluta akuerisarparput. Ilisimasassat tamatta assigiit pigaagut. Massakkut allatut nipilimmik oqalinneq pissuserinnerinngilaq kusanarnanilu.

Ukioq manna illoqarfinnut nunaqarfinnullu angalanissat unitsinneqarput aningaasarpassuarnik naleqarmata. Tamanna akueriinagassarivarput, qujarutigalugu borgmesteri aterfilittanilu nassuiaateqariartorlutit angalalermata.

Akisussaaffik tiguneqassaaq qimarratiginagu. Aamma aaqqiissutissanik ujartuillutalu, suleqatigiisaagut, qimarratiginninnata. Minnerunngitsumik inuit attaveqaqatigiittarfiisigut paasissutissanik eqqunngitsunik paasissutissiiginnartarneq unittariaqarpoq innuttaasut eqqortumik nassuiaanneqartariaqarput. Soorlu ulloq 15.08.24 Karen-Marie Kyed Frederiksen-i saqqummiussivoq inunnik isumaginninnermik ataatsimiititaliami ataatsimiinernik kinguartitsisoqartoq. Pingaartissimavarput ataatsimiititaliami ilaasortat tamarmik peqataanissaat. Tamanna aamma Demokraatini ilaasortap ilisimalluinnaraluarpaa sooq taama kinguartitsisariaqartugut, siornatigummi arlaleriaq demokraatini ilaasortaasup nammineq peqataasinnaasannginneq aqqusaartarpaa. Demokraatini ilaasortap Karen-Marie Kyed Frederiksen-ip aammalu Margrethe Thourup Andersen ippassaq 15.08.24 saqqummiussamini eqqaavaat Inunnik isumaginnittoqarfik ajorluinnartumik inissisimaneraaneq. Innuttaasut paasisariaqagaat tassaavoq ukiorpassuarni inunnik isumaginnittoqarfimmi meeqqanik ornittakkamik soqanngilaq, aap Nanortalik peqareeraluartoq saniatigut illoqarfiit tamarmik ornittakkamik pilersitsinikkut meeqqat inuusuttuaqqallu pisariaqartitsineq annertoqimmat atorluarneqarpoq, qimarnguinnut akisussaaffik Kommune Kujalliup tigunikuuaa aatsaallu akisussaaffiup tiguneqarneratigut sullissineq qimarngisunut ingerlallualerpoq. Inunnik isumaginnittoqarfik suliffigissaanissaq eqqarsaatigalugu oqaloqatiginnittarfinnik aammalu allaffissanik pilersitsisoqarpoq, tamarmik aningaasanik naleqarput. Aammattaaq meeqqanik inuusuttuaqqanillu kinguaasiutimikkut killissamik qaangiiffigineqarsimasut katsorsarneqarnissaat suliniummi pilersitsinitsigut katsorsaaneq ingerlanneqarnikuulluni. Familierådslagning pilersinneqarpoq ilaqutariit pisariaqartitsisut arlaliusut maanna sullinneqarlutik aallartinnikuupput, tamakku tamarmik aningaasanik naleqarput. Aningaasanik tammaanarneraaneq inissaminiinngilaq. Ilaasortat pineqartut ilisimavaat aningaasat sumut atorneqarsimanersut, aamma sooq akileraarutinik akiliisimanngittugut maannamut. Aqutsinerlunneraasarneq eqqortuungilaq innuttaasunik malinnaatitsiuarpugut, ukiuni pingasunngoreersuni arlaleriarujussuarluta illoqarfiit nunaqarfiillu tikittarnerisigut innuttaasut kissaataat aammalu oqariartuutai aallaavigalugit suliniutinik amerlasuunik naammassinninnikuulluta. Tamanna Demokraatini ilaasortat peqataaffigisarpaat. Paasisinnaangilarput aqutsinerlunneraasarneq peqataatitsinnginnermillu oqariartuuteqaqattaarnerat, tamanna inissaminiingilaq.  Suleqateqarusinngissuseq suleqatiginnikkusussermik taarserlugu innuttaasut atungaat aaqqiiviginnaavagut.

Inussiarnersumik

Sofia Olesen

Pipaluk Jakobsen Larsen

Inuit Ataqatigiit