Inatsisartuni ilaasortap Lars Poulsenip ”Kommune unammillertariaqarparput 2009 – 2023” (Kommunip nukillaartilerpaatigut)-mut saqqummiussaanut akissut.
Oqariartuummi 2009 aallarnerfiummat kingumut qiviartariaqarpunga. Naluneqanngitsutut kommunit kattussuunnerannut atatillugu 2008-mi Ikaarsaariarnermut Ataatsimiititaliami nuna tamakkerlugu qinersisoqarpoq, 2009-mi kommunal-bestyrelsinngortumi.
Ukioq 2008 qinersineq tikillugu taamani Ammassallip Kommunerisimasaa aningaasatigut nakkaateqalluni kommunit kattuffianniit nakkutigisaavoq. Sunut tamanut aningaasaliissutaasartut appasinnerpaaffianiipput, innuttaasunut ilungerunangaartumik, minnerunngitsumik politikkikkut sullissinermi ilungersunarnerpaaffimiilluni. Qinersineq 2008-mi pisoq tikillugu ukiorpassuarni Siumut Ammassallip kommuniani siuttuuvoq.
Uanga nammineq oqaatigisarpara, kommunit kattussuuneranni Nuuk ilanngullugu kommuneqatigiilernitta annaannikuuaatigut. Ukiut siulliit kommunalpolitikeritut ingammik qinigaarlaajulluni suliniarneq ilungersunaqisoq.
Oqaatigineqartutuut sunut tamanut aningaasaliissutit appasinnerpaaffimminiipput, taamaalilluni kommunit kattunnitsinni Tasiilamut aningaasaliisarnerni aallaqaammut taakku aallaaviusarlutik. Aningaasaliissutit qaffatsinniarsareqqinnerat nukinik annertuumik atuiffiunikuuvoq.
Kitaamiut Europamiullu inooriaasiannut naleqqussassasugummik Tunumiut inooriaaseqalernissatsinnik oqariartorneq ilisarinngilara.
Kattukkattami oqariartuutigiuarparput, assigiinngissuserput nakooqutitut, isummanillu assigiinngitsunik katersuiffittut atussagipput.
Tunumiut kulturitsinnik kommunip pingaartitsinera annertuvoq. Piffisap ilaani ukunik arlalinnik kommuni Tunumiut kultureqartitsisarnikuuvoq Nuummi ingerlanneqartartumik, nuannersorsuarmik kulturikkut avitseqatigiinnermik assigiin-ngitsunik sammivilinnik pisorpassuaqartarluni.
Nunatsinni kisiartaagunarpugut Inuusuttut Tasiilami Kulturhuseqalernikuusugut, massakkut siunertaqarluartumik ingerlatsiffiuvoq. Sanaluttartuutivut pikkorissut nutaamik pitsaanerusumillu sanaluttarfeqalernikuupput. Musikskole inuusuttuarartavut nipilersornermik pikkoringaartut allaat kitaanut tusarnaartitsiartortalernikuupput nuannarineqarluarlutik.
Ullutsinnut tulluartumik qaannami atuisinnaanermi, ilaatigut takornarialerinermik sullissisinnaaneq imarisamigut ilaqatumik pikkorissaanerit ingerlapput.
Kommunini siullersaalluta Nunaqarfinni Aqutsisunut annertunerusumik akisussaaffimmi tunniussinikuuvugut, Aqutsisullu siulittaasui kommunimi sulinermi kommunalbestyrelsitigoorlugu annertuumik akuutinneqarput.
Najukkami Ataatsimiititaliaq eqeersimaatorujussuaq ukiunilu atuuffimmini illoqarfimmut pitsaasumik sunniuteqangaartoq ingerlarsorpoq.
Inuusunut unittoornikut ingerlariaqinnissaannik sullisisut Siu – Tsiu avataanniit torrallaasutut isigineqartoq ingerlarsorpoq, nunattalu sinneranut maanna siaruariartorluni.
Inuussutissarsiornikkut suliffeqarnikkullu siuarsaanissamik suliaqarneq Tasiilami Erhvervsråd aqqutigalugu ingerlaavarpoq. Tasiilami kommunimi issiasumik Erhvervskonsulenteqalernikuuvugut.
Suliat annertuut ilagivaat aalisarnermut ikaarsaariarnermi suliaqarneq, maanna inuusuttut amerliartuinnavissut aalisarnermik inuussutissarsiuteqaleriartuinnarnerannik pitsaasumik kinguneqartoq. Kommunimut tamarmut atuuttumik Aalisarnermut kommunerput periusissiaqarpoq. Tasiilap illoqarfittut ineriartornissaanut kommunerput periusissiaqarpoq. Kalaaliaraq ukioq kingulleq pilersinneqarpoq.
Ukioq manna mersortarfik ”Qeerpi” nammineq ingerlattoq Nuummi ammerivik ”Kittat” suleqatigalugu aallartippoq. ”Qeerpi Tasiilamiuvinnarnik ingerlanneqarpoq, Tasiilamiumillu pisortaqarluni. Tassani aamma Tunumi kulturitta pingaarluinnartut ilaat, tassa Tunumiut atisatoqaat mersortariaasiannilu tammatsaaliorneq pitsaasumik suliniarfigalugu aallartippoq.
2014-imi suliffiit/atorfiit ilaanni Nuummut nuusineq kukunerusoq paasivarput, kingornalu iliuuseqarfigalugu. Atorfinnik utertisiortorneq ukiut kingulliit ingerlannikuuvagut. Akisussaaffiit ilai tamakkiisumik Tasiilamut nuunikuuavut, allaat immikkut Tasiilami kommuni pisotaqalersillugu. (Områdeleder) Allaammi isumaginninnikkut sullissinermi immikkut Tasiilamiittussamik fagshefeqartitsinikuulluta, naak taakku nalinginnaasumik Nuummiittaraluartut.
Inunnik isumaginninnermut kommunimi aningaasaliissutaasartut kr. milliuunerpassuit pingasorarterutaat Tasiilaannarmut tuttarnikuupput. Suliniuterpassuillu ulloq manna tikillugu ingerlajuartut suli atuupput.
Immikkut kommuninngoqqinnissaq piffissami sivitsortumi oqallisaavoq. Tasiilami partiit aamma TIA (Tasiilami Inuit Ataqatigiit) akerliunata oqalliseqataavugut, allaat alloriarnisamik misissugaqarluta, tassalu Frikommune periarfissatut misissorlugu, aningaasatigut imminut napatissinnaalerumarnitta tungaanut atuussinnaasumik.
Ataasialinngilaq massakkut saqqummiisoq Tasiilaq innuttaalu pillugit ajornerpaamiitillugit saqqummiinera. Ingammik TIA-miit erseqqissartarparput kitaaniit (ungasissumiit) sullinneqarnerput aporfissaqartaqisoq immitsinnummi ungaseqigatta, imaaliallaannaq saaffigisatsinnut ornillugu isersinnaasannginnatta.
Ingamik suliffissatigut (anginaasarsiorfissatigut) immitsinnut napatissinnaanerput periarfissaalerpat, ilaana immikkut kommuninngornissarput pimoorullugu naammassillugulu sulissutigillarumaarparput.
Siunertaq ataatsimoorfigigatsigu saqqummiisumut kaammatuutigerusunnarpoq, taartuinnarmik saqqummiisaqattaaginnarani suleqataaqqullugu. Taamatut saqqummeqattaarneq suliniarnermut siuarsaataanngimmat, akerlianilli suliniarnermut nukillaarsaataalluni.
Suleqatigiinnissamik kissaateqarlunga.
Harald Bianco
Kommunalbestyrelsimi Ilaasortaq
Kommuneqarfik Sermersooq
Inuit Ataqatigiit
Inatsisartuni Ilaasortaq
Inuit Ataqatigiit