25.09.2023
Inuit Ataqatigiit Uranimut angertunngunngillat aamma angertunngornavianngillat.
Naalakkersuisoqatigiit ilassutitut isumaqatigiissuteqarnerisa kingunerisaanik partiit ilaat aalassatitserusuissorlutik paatsoorsaaralutik ingerlatsilerput, taamaammat ersarissaasariaqarpugut.
Naalakkersuisooqatigiinissami ilassutitut isumaqatigiissumi ima allassimasoqarpoq:
“Aatsitassanut pinngoqqaatinullu qaqutigoortunut suugaluartunulluunniit illersorneqarsinnaasumik isumannaatsumillu inatsisillu malillugit periuseqarnissaq pillugu Nunatta politikeqarnera siunertaqarpoq, aningaasarsiornikkut ineriartornissamik aamma avatangiisinut inuiaqatigiinnullu illersuisumik ingerlatsinissamik.”
Malugalugu Inatsit atuuttut malillugit, tassa imaappoq uranimut inatsi attuuttoq atuuppoq taannalu malinneqassaaq.
Taasumap saniatigut atsiugaq tassaavoq Ilaasutitut isumaqatigiissuk tassa siuliani isumaqatigiissuk atuuttoq suli atuuppoq tassanilu ersarilluinnartumik ima allassimasoqarpoq:
“Uranimut apeqqut ullumikkut atuuttutut sammiveqartinneqassaaq, apeqqullu allanngortinneqassappat aatsaat inuiaqatigiit taasinermikkut tamanna naqissusissavaat. Taasissutigineqassappallu innutaasut naammattumik illuinnaasiunngitsumillu qaammarsaavigineqarnissat avaqqunneqarsinnaanngilaq.”
Taana aamma suli atuuppoq.
Naggataagut Inuit Ataqatigiit naalakkersuisooqatigiinnermi ilassutitut isumaqatigiisutaani qineqqusaarutigisimasatta ilaat pingaarutilik tassaasoq aatsitassarsiorniartoqaruni inoqarfinnut qanittuni taava pinngitsoorani innuttaasut pinngitsooratik isumasiorneqassapput.
“Aatsitassarsiorfiusinnaasut inoqarfinnut qanittumiittut tamarmik immikkut ittumik isiginiarneqassapput, avatangiisinut peqqissutsimut inunnullu tunngasunik annertusisamik piumasaqaateqarfigineqassapput aamma sumiiffimmi najugaqartut pilersaarutini pineqartuni qanimut akuutinneqartassallutik.”
Taamaammat ilassutitut isumaqatigiissummi Inuit Ataqatigiinni nuannaarutigaarput qineqqusaarutitta maanna timitalerlugu suleqatigisatsinnit aamma isumaqataaffigineqalermat.
Naggaterpiaagut Inuit Ataqatigiit Uranimut naaggaarluinnarput, taanna allanngortinneqarnavianngilaq naaggaartuarnikuuvugut aamma naaggaartuassaagut uranip ulorianassusaanut ilisimasagut naammattorsuit pigaagut taakkulu tunngavigaagut.
Mariane Paviasen
Inuit Ataqatigiit