Tunup avannaani umiarsuit takornariartaatit nakkutigineqarnerusariaqarput
Illoqqortoormiit eqqaanni avannaanilu aamma Illoqqortoormiit Tasiilallu akornanni umiarsuit takornariartaatit angallattut nakkutigineqarnerunissaannik Naalakkersuisut matumuuna kajumissaarniarpakka. Nakkutilliineq pitsaanerulinngippat sumiiffinni pineqartuni arferit, eqaloqarfiit, qularnanngitsumillu umimmaat siunissami oqaluttuaannanngoriaannaammata. Tunup avannaani nunami immamilu uumasuusivissuatsinnik taasartakkatta paarilluarnerunissaa pisariaqarluinnarpoq.
All. Juaaka Lyberth, (IA) Sermersuumi kommunalbestyrelsimut ilaasortaq.
Qilalukkat ingerlaartarfii takornariartaatinit akornusersorneqarput
Sermersuumi sinerissap qanittuani piniarnermut aalisarnermullu siunnersuisoqatigiit, piniartut aalisartullu peqatigiiffiisa sinniisuinit kangianit kitaaneersunillu ilaasortaaffigineqartumit, siulittaasuattut, tunup avannaarsuani, pingaartumik Illoqqortoormiit eqqaannni avannaanilu aamma Tasiilap Illoqqqortoormiillu akornanni umiarsuarnik takornariartaatinik angallannermut nakkutigineqanngitsumut, Naalakkersuisut nakkutilliinerutitsinissaannik matumuuna kajumissaaruteqarpunga. Siunnersuisoqatigiinni kingullermik ataatsimiinnitsinni ilaasortatsinnit tunumeersunit nalunaarutaasut tupannartut taamaasiortariaqarlersimmannga.
Illoqqortoormiit eqqaannut avannaannullu aasaq manna umiarsuarpassuit takornariaassinissaat naatsorsuutigineqarpoq, umiarsuillu tamakku kangerlunnut itisuunut pulatartarput, aamma qilalukkat qaqortaq qernertallu ingerlaartarfiinut ernisarfiinullu. Umiarsuarsuit motoriisa nipersuisa qilalukkat tamaaniittut assut akornusersortarpaat. Umiarsuit amerliartuinnartut akornusersuisarnerisigut aamma sila allanngorneratigut immap sarfaasa aqqutaat allanngormata, qilalukkat ingerlaartarfii allanngulersimasut nalunaarutigineqarpoq. Aamma ilanngullugu nalunaarutigineqarpoq umiarsuarsuit ilaat eqaloqarfinni qassusersorlutik eqaluppassuarnik pisaqartartut, unnukkullu umiarsuarmi ilaasuminnut sassaalliutigalugit. Kiisalu nalunaarutigineqarportaaq akulikilliartuinnartumik naammattoorneqartartut umimmaat, quttorai piiginnarlugit sinneri qimatat. Soorunalumi aamma isumaqarpunga Illoqqortoormiit kangerlussuata paavani innat appaqarfiit pingaarutillit marluk umiarsuarnit qanillinaveersaarneqartariaqarluinnartut
Tasiilap eqqaani piniartut aalisartullu peqatigiiffiisa sinniissaannit nalunaarutit assingerluinnangajaat tutsiupput, pingaartumik Kangerlussuarmut, Tasiilap avannaaniittumut, qilalukkat qaqortat qernertallu ingerlaartarfiinut, umiarsuit takornariartaatit pulasarneri uumasunik assut akornusersuisutut oqaatigineqarmata.
Piniartut aalisartullu tunumeersut nalunaarutaat taama ittut tusaanngitsuusaarneqarsinnaanngillat. Tunumilu takornariartaatit angallannerinimik pitsaanerusumik nakkutiginninnissaq pisariaqarluinnartutut illuni. Takornarissat soorunami tikilluaqqusaapput, kisianni uumasut piniagassat annerusumik innimigineqartariaqarput, tappavani piniarnermik inuussutissarsiuteqarneq siunissaqassappat. Sermersuumi piniarnermut aalisarnermullu siunnersuisoqatigiit sinnerlugit matumuuna Naalakkersuisut kajumissaarniarpakka tunup avannaarsuani umiarsuarnik takornariartitsisarneq nakkutigineroqqullugu.