Kiisami naligiisitsisoqarnissamik neriorsuut.

Ukiorpassuarni uteriitumik kimigiisertoqareersoq isumaqatigiinniartoqartareersorlu kiisami danskit naalakkersuisui neriorsuipput politiit aamma isertitsivinni betjentit sulianut assigiissunut akissarsiamikkut assigiisinneqalernissaanut aaqqiissuteqassallutik.

Assigiinngisitsinerup akuerineqarsinnaanngitsup unitsinneqarnissaanut Inatsisartuni Inatsisinut Ataatsimiititaliamiit uteriiserluta kimigiiseqataasimavugut – Inatsisit Atuutsinneranut Naalakkersuisoq aamma Folketingemi ”Rets- og Grønlandsudvalg”, minnerunngitsumillu Folketingemi kalaallit ilaasortat, peqatigalugit. Ukiorpassuarni kimigiiserneq kiisami pitsaasumik inerneqartussanngorpoq.

Ukiorpassuarni assigiinngisitsineq akuerineqarsinnaanngitsoq kiisami unitsinneqalermat Inuit Ataqatigiinni nuannaarutigaarput. Uani pineqartoq tassa ukiuni qulikkaani tunngavissaqanngitsumik assigiinngisitsineq unitsinneqartussanngortoq, naammagisimaaralugulu maliginiarparput danskit Inatsisit Atuutsinneranut Ministeriata nutaarsiassaq taanna nuannersoq, kiisami Naalakkersuisunik ataatsimeeqateqarnermini apuussimagaa.

Nunatsinni politiitut aamma isertitsivimmi betjentitut sulineq arlalippassuartigut sakkortullunilu ilungersunartuusarpoq aamma  isumaginninnernikkut oqimaatsunik suliassaqarfiusarluni. Ukiuni qulikkaani arlalissuarni akissarsiatigut, soraarnerussutisiatigut aamma suliffimmi atugassarititaasutigut assigiinngisitsineq maanna kiisami unitsinneqartussanngorpoq.

Inatsisinut Ataatsimiititaliami ilaasortatut kissaatigaara Naalakkersuisuutitarput aqqutigalugu danskit naalakkersuisuinut suliaq malinnaaffigijuassagipput, qulakkeerniarlugu aaqqissuutissamik ataavartussamik neriorsuutip piviusunngortinneqarnissa.

Asii Chemnitz Narup

IA sinnerlugu Inatsisinut Ataatsimiititaliami ilaasortaq