Nunatsinni silaannakkut immakkullu angallannerit ulluni makkunani ajalusoorfiupput. Inuit Ataqatigiit isumaqarpugut silap ajalusoortitsisarnera naalakkersuinikkut isummernissamut sinnassaattaassanngitsoq.
Inuit Ataqatigiit Naalakkersuisut sakkortuumik piumasaqarfigaat angallannermut isumaqatigiissutit ataatsimut isiginiarlugit nalilersuiffigeqqullugit. Iliuuseqannginneq akisussaaffeqanngitsuliornerussaaq. Mittarfissuit marluk ammartussanngorput, angallannikkullu isumaqatigiissutaasut maanna atuuttut taakkununnga naleqqussarneqarsimanngillat.
Inuit Ataqatigiinni siunnersuutigaarput naalakkersuisoq akisussaasoq partiinik oqaloqateqarluni aallartissasoq. Nalilersuinissamik aammali innuttaasut angallanneqarnerisa pitsaassusissaannik innersuussuteqarfiusussamik oqaloqatigiinneq ingerlassasoq neriuutigaarput. Nunatsinni isorartuumi najugaqartuusugut pilluta ataatsimut isiginnittumik angallannikkut aaqqissuussinissamut piffissanngorpoq.
Mikivsuk Thomassen
Inatsisartunut ilaasortaq, Inuit Ataqatigiit