Inuit Ataqatigiit

Aaja Kalaallit Nunaanni illersornissaq isumannaallisaanerlu pillugit innuttaasunik ataatsimiisitsissaaq

Aaja Kalaallit Nunaanni illersornissaq isumannaallisaanerlu pillugit innuttaasunik ataatsimiisitsissaaq

Inuit Ataqatigiit Folketingimut ilaasortaatitaat Aaja Chemnitz innuttaasunik ataatsimiisitsinissamut aggersaavoq, illersornissaq pillugu isumaqatigiissutissap Folketingimi oqallisigineqarnissaanut kissaatigisat siunnersuutillu oqallisigitikkumallugit.

 Pingasunngornermi 22. marts 2023 nal 17.00-imiit 18.30-mut Inuit Ataqatigiit Folketingimut ilaasortaatitaat Aaja Chemnitz-ip Hotel Hans Egede-mi innuttaasunik illersornissamillu soqutiginnittunik ataatsimiititsissaaq, Kalaallit Nunaat isumannaallisaanikkut politikkimut tunngasunik aamma isumannaallisaaneq pillugu isumaqatigiinniarnissaq Folketingimi 2023-mi ingerlanneqartussaq pillugu oqallittoqarnissaa siunertaralugu.

”Maanna isumannaallisaanermi politikkikkut inissisimalernerup kingunerisa ilagaat Kalaallit Nunaata Issittullu illersornissamut sillimaniarnermullu politikkikkut pingaaruteqarneruleriartuinnarnerat. Ilimagisinnaavarput tamanna illersornissaq pillugu isumaqatigiissutissami ersissasoq, taamaammallu Kalaallit Nunaata ersitsinneqarnissaa pillugu tamat oqartussaaqataanerat tunngavigalugu oqallittoqarnissaa pisariaqartipparput” Aaja oqarpoq.

Innuttaasuni ataatsimiisitsinermi sulisut immikkullu ilisimasallit saqqummiissapput, maanna isumannaallisaanermi politikkikkut inissisimaneq tamatumalu Kalaallit Nunaannut qanoq sunniuteqarsinnaanera pillugit saqqummiisassallutik. Peqataasussat ilaatigut tassaapput ambassadør Michael Zilmer-Johns aamma peqatigiiffik Folk & Sikkerhed maanna pissusiusunik naliliinerminnik saqqummiisussat. Naggasiullugu workshoppertoqassaaq, isumannaallisaaneq pillugu isumaqatigiissutissamut innuttaasut siunnersuuteqarlutillu isumassarsiaasinnaasunik saqqummiiffigisinnaasaannik.

”Kalaallit Nunaanni sakkutooqarnikkut annertusaasariaqalissagaluarutta, qularnaartariaqarparput tamatuma innuttaasunut iluaqutaanissaa. Taamaammattaaq peqataatinnissaat pingaartuuvoq, sunik pisariaqartitsisoqarnera ilisimaniassagatsigu” Aaja oqarpoq.

Innuttaasunik ataatsimiisitsineq pissaaq pingasunngornermi 22. marts 2023, nal.17.00-imiit 18.30-mut Hotel Hans Egede-mi. Kaffeqarlunilu teeqassaaq kaageqarlunilu.

Saaffiissaq:

Aaja Chemnitz

Aaja.Chemnitz@ft.dk

+45 61 62 46 67

DEL

Del på Facebook
Del på Twitter
Del på Linkdin

Skrev en kommentar

Scroll to Top