TUSAGASSIUUTINUT NALUNAARUT
Siorna akileraarusiisarnermik allannguinerit sulinermi ajunngitsorsianut tunngasut atulersinneqartut, soorlu akeqanngitsumik billeqartitaanerup, interneteqartitaanerup, oqarasuaateqartitaanerup il.il. annertunerusumik akileraaruserneqartalerneri isornartorsiorneqarput.
Allannguinerit naligiinnerulernissamik pissakinnerpaallu annertunerusumik aningaasatigut iliuuseqarfigineqarnerunissaannut politikkitsinnut naapertuupput.
Inuit Ataqatigiit akissaatikinnerpaat aningaasatigut iliuuseqarfigineqarnissaannik sulissutiginnittuunerat qularutigineqassanngilaq. Aningaasaqarnerput taamaatuartillugu peqarnerusut pilliuteqarnerulaartariaqarput, sulinermummi akileraarutip qaffanneqarnissaa kissaatiginngilarput, taamaammallu atorfeqartitaanermi akeqanngitsumik ajunngitsorsiat qissiminneqarnerat pissusissamisoortutut isigalutigu.
Akeqanngitsumik biileqartitaanerup mobiileqartitaanerulluunniit akileraaruserneqarnera uatsinnut naapertuutinngittuliornerunngilaq. Taamaattoqarnissaa kissaatiginngikkaanni ajunngitsorsianut qujaannartoqarsinnaavoq.
Malittarisassiornerit eqapilaartuusariaqarput. Aap, suliffinni akeqanngitsumik nerisaqartinneqaruit nerisatit akileraarutigissavatit. Taakkumi ajunngitsorsiatut pissarsiaraatit, taamaanngippammi nerisatit akilertussaagaluarpatit. Malittarisassat misissorlugit suli naapertuunnerat nalilersortuaannarsinnaavarput, inuiaqatigiilli qitiusumik ikiorsiissutaat akilerneqartussaapput, utoqqartagullu amerliartortut pitsaasumik inuuneqarnissaat tamatta kissaatigaarput. Tamakku tamarmik imminnut ataqatigiipput.
Erseqqissaatigissavarpullu akiliunneqarluni sulinngiffeqarnerup siulliup akileraaruserneqartussaannginnera, aappaaniilli aatsaat akileraarusiineq aallartittassaaq. Tassa sulisitsisumit akiliunneqarluni sulinngiffeqarluni ukiumut angalaneq ataaseq akileraaruserneqartussaanngilaq. Aningaasanut inatsimmut atatillugu suliffimmut atatillugu angalanermi ullut tallimat sinnerlugit freernerup akileraaruserneqartarnera atorunnaarsipparput. Tassa sulinngiffeqarnermi akiliunneqarluni angalanernut malittarisassat ukiuni 20-ni kingullerni atuuttut taamaaginnarput.
Qanoq akileraarutitigut akitsuutitigullu aningaasanik pissarsisarnerput akileraartarnermik aaqqissuusseqqinnermik suliaqarnitsinni oqallisigissavarput. Inuit Ataqatigiit akileraarusersueriaaseq naapertuunnerusoq anguniarpaat, akissarsiakinnerpaat aningaasanik amerlanerusunik atugassaqalernissaat sulissutigivarput.
Aningaasaqarnerput ataatsimut isigalugu piviusorsiussaagut. Utoqqaat amerliartornerat ilisimaaraarput, inuillu pisortat sullissinerinik pitsanngoriaateqartitserusunnerat ilisimavarput. Taamaammat innuttaasut akeqanngitsumik ilinniagaqarsinnaanerat, akeqanngitsumik nakorsiarsinnaanerat, sullissinernut isumaqatigiissutinut aningaasassaqarnissaq il.il. qularnaartussaavagut, aningaasallu innuttaasunit, akitsuutinit, ataatsimoortumik tapiissutinit EU-millu pissarsiarisarpavut.
Aalajangikkavut akisussaaffigaavut ajornakusoortumillu pingaarnersiussalluta, taamaaliunngikkuttami akisussaassuseqanngitsumik iliussaagut.
Agathe Fontain,
Inuit Ataqatigiit Inatsisartuni politikkikkut oqaaseqartartuat