Inuit Ataqatigiit

TUSAGASSIUTINUT NALUNAARUT Inuiaqatigiit Inatsisaat pingaarneq partiit tamatta akueraarput.

Inuit Ataqatigiit nuannaarutigilluinnarparput Aningaasanut Inatsit 2023-moortoq partiit tamarmik suleqatigiillutik akuerimmassuk. Malugisassaavoq, pisoq qaqutigoorpoq. Naammassinissaanullu akitsuutinik matussiisoqanngilaq, tassalu pitsaaqutaa.

 

Naalakkersuisut qujunaq tamanut tusarnaarlusi, peqataatitsigassi, ammasumillu ingerlatsinermut qujanaq.

 

Inuit Ataqatigiit nuannaarutigaat, akitsuutit siusinnerusukkut Aningaasanut Inatsimmut putunut matussusiinermut atorneqartarneri tamannga killeqarmata. Aappaagumullu Inatsimmi akitsuutinik ikkunneqarsimagaluartunik piiaanerput, innuttaasut aningaasaqarnermi artukkerneqarsimagaluarnerat tassuuna peerneqarput.

Ulluni imaannaanngitsuni. Sorsuttoqarnerup nalaani.

Tamanna takussutissaavoq, Inuit Ataqatigiit, innuttaasut artukkerneqarnerannut iliuuseqartugut.

 

Taamaammat pinngitsoorata inuusuttorpassuit suliffeqanngitsut imaluunniit Meeqqat Atuarfianniit ingerlariaqqinneq ajortut, taamaattumillu inuiaqatigiit avataanullussooq inissisimasut, ikilisarluinnarnissaat pisariaqartilluinnarparput.

 

Peqqinnissaqarfimmut sammisumik, marloqiusamik sammivilerluta peqqinnissaqarfik kivittariaqarparput: ajornartorsiutit pinartutut nalililertariaqartut piaarnerpaamik qanoq iliuuseqarfigisariaqarluinnarput.

Inuusuttut nunaqarfinni najugartut siunissamut ilinniartunngornissamut suliffeqalernissamullu takorlugaat tusarusukkatsigit aappaagu ataatsimeersuartinneqassapput. Inersimasut ukiut tamangajaasa ataatsimeersuartinneqartarnikuupput, maanna inuusuttut nipaasa inuiaqatigiinnut apuunneqarsinnaanissaannut periarfissiilerpugut.

 

Aamma ungasinnerusoq isigialugu tunngaviusorujussuartigullu peqqissutsimut politikki ataatsimoortoq ilusilertariaqarpoq.

 

Aningaasanut inatsimmi Dronning Ingridip Napparsimavissuani meeqqanut immikkoortortaqalernissaq aamma meeqqat inuusutullu tarnikkut  misissorneqartussat sukkanerusumik ikiorneqassasut 2023-mut aningaasanut inasit aqqutigalugu qulakkeerneqassapput.

 

Kultoorerput, oqaatsigut pingaartikkatsigit oqaasileriffik pisariaqartitsimmat aningaasaliisutit qaffanneqarput. ICC Issittormiut tamakkerlugit sulittaasuuffeqarnera isiginiarparput. Inuit pingaartillugit.

 

Nukissiuutit minguitsut atorlugit, Qasigiannguit Aasiaallu nukissiuuteqarlernissaat, kiisalu Nuummi Tasiilamilu pioreersut annertusarnissaannut aningaasalisoqarpoq.

 

Nuannaarutigeqaarput nunaqarfinni isorliunerusunilu nioqqutissanik pilersuinermik sullissinnerup pitsanngorsarnissaanut atsioqatigiinnitsinni ilanngullugu naqissuserneqarmat. Naajaat, Nutaarmiut aamma Qeqertat immikkut pitsanngorsaavigineqarsinnaanissaat suliassanngorpoq.

 

Partiit tamassi qujanaq, inuiaqatigiinnut pitsaanerpaaq anguniarlugu, tamatta suleqatigiisinnaagatta.

 

Politikkikut oqaaseqartartoq

Agathe Fontain

Inuit Ataqatigiit

DEL

Del på Facebook
Del på Twitter
Del på Linkdin

Skrev en kommentar

Scroll to Top