Inuit Ataqatigiit

TUSAGASSIUUTINUT NALUNAARUT Innuttaasut pissutsinik isertuussanik kalerriisartut pitsaanerusumik illersorneqassapput

Innuttaasut namminneq suliffimminni pissutsinik isornartunik unioqqutitsinernillu nalunaaruteqartut pitsaanerusumik illersorneqassapput. Innuttaasut isertuussanik kalerriisartut pillugit inatsisiliuinissamik Naalakkersuisut peqquneqarnissaannik aalajangiiffisassatut siunnersuut Inatsisartuni sisamanngorpat oqallisigineqassaaq. Aalajangiiffigisassatut siunnersuut Inatsisartunut IA sinnerlugu ilaasortamit Asii Chemnitz Narupimit siunnersuutigineqarpoq.

Asii Chemnitz Narup oqarpoq:

Suliniaqatigiiffimmi, suliffeqarfimmi pisortalluunniit suliffeqarfiutaanni nammineq suliffigisami kukkusumik pisoqarneranik saqqummernissamut uparuaanissamullu innuttaasut amerlanersaannut annertuumik sapissuseqarfiusariaqarpoq. Ammasumik isornartorsiuigaanni immaqa ajortumik isigineqalernissaq inuuniutilluunniit annaaneqarnissaa annilaangagineqartarluni.

Pissutsinik isertuussanik kalerriisartut kingullertigut sulianik arlalinnik nalunaaruteqartartut takunikuuagut, qujassutigisariaqakkatsinnik. Inuiaqatigiinni ingerlalluartuni tamallu oqartussaaffigisaanni taamaaliornissaq pingaartuuvoq. Pissutsinik isertuussanik kalerriisartut inatsisitigut illersugaanersut, inatsisilerinermi ersarissunik ullumikkut takkussutissaqanngilaq. Pissutsinik equngasunik unioqqutitsinernilluunniit nalunaaruteqarnissamut amerlanerusut sapiissuseqalersinniarlugit inatsisitigut illersorneqarnissaannik pisariaqartitsivugut.

Pissutsinik isertuussanik kalerriisinnaanermut inatsisikkut qulakkeerneqassaaq,  suliniaqatigiiffinni, sulliffinni namminersortuni imaluunniit pisortat suliffeqarfiini, namminneq sulliffigisaminni, pissutsinik isornatoqartillugu, innuttaasut kalerriussisut, kalerriussinermik malitsigisaanik qanoq ittumilluunniit pillarneqartannginnissaasa.

Aalajangiiffigisassatut siunnersuummi pissutsit arlallit inatsisissap imarisariaqagai oqaatigineqarput:

  • Pissutsit nalunaarutigineqartut unioqqutitsineruppata nipangiusimasussaatitaanerup unioqqutinneqarneranik unnerluunneqarnissamut illersugaaneq
  • Nalunaaruteqarnerup kinguneranik pillaatitut akiniutinut sunulluunniit illersugaanissaq
  • Pissutsinik isertuussanik kalerriiniartoq nalunaaruteqanngitsoortinneqassanngitsoq
  • Suliffeqarfiup pissutsinik isertuussanik kalerriisoq pillarpagu taarsiivigineqarnissamik piumasaqarsinnaaneq
  • Pissutsinik isertuussanik kalerriisarnermik aaqqisuussinerup qanoq atorneqarsinnaaneranik suliffeqarfiit, suliniaqatigiiffiit pisortallu suliffeqarfiisa sulisunut ilitersuisussatitaassasut.
  • Pissutsinik isertuussanik kalerriisarnermik, avataani aaqqissuussinermut sumulluunniit attuumassuteqanngitsumik, nammineertumillu nalunaarutinik tigusisartussamik suliarinnittartussamillu pilersitsisoqassasoq.

Inuit Ataqatigiit isumaqarput atorfinni ileqqorlunnernik pissutsinillu equngasunik sunilluunniit nalunaaruteqartarnissaq Kalaallit Nunaanni qulakkeerneqassasoq. Taamaammat inuit ataasiakkaat illersorneqarnissaat pingaaruteqarpoq, neriuppungalu Inatsisartut siunnersuutiga tapersissagaat, Asii Chemnitz Narup naggasiivoq.

 

 

DEL

Del på Facebook
Del på Twitter
Del på Linkdin

Skrev en kommentar

Scroll to Top