Inuit Ataqatigiit

Aningaasaqarnermut Siunnersuisoqatigiit meeqqat atuarfiat pillugu isumaliutaat pingaaruteqartut

Asii Chemnitz Narup, Inatsisartunut ilaasortaq aningaasaqarnerlu pillugu oqaaseqartartoq:

Kalaallit Nunaanni Aningaasaqarnermut Siunnersuisoqatigiit nalunaarusiaanni kingullermi meeqqat atuarfiat immikkut – pisariaqarluinnartumilli – sammineqarpoq.

Nalunaarusiami ilaatigut ajornartorsiutit ilisimaneqartut tikkuarneqarput assersuutigalugu inuussuttorpassuit meeqqat atuarfiannit ilinniagaqarnermut ingerlaqqinngitsut, ilinniartitaanermi naligiinnginneq inuiaqatigiinni ataatsimut isigalugu naligiinnginnermut sunniuteqartoq. Nalunaarusiami atuarfimmik nalilersuinissamut tunngavissanik nutaanik ujartuisoqarpoq.

Asii Chemnitz Narup, IA-p aningaasaqarneq pillugu oqaaseqartartua oqarpoq:

-Ilinniartitaaneq pillugu politikkimi nunatsinni suliffeqarfiit piginnaasalinnik naammattunik sulisussaqarnissaat pingaaruteqarluinnartoq Aningaasaqarnermut Siunnersuisoqatigiit isumaqatigilluinnarpakka – tassanilu meeqqat atuarfianni aallartinissaq pisariaqarpoq. Amerlanerungaartut inuusuttut ilinniagaanni ingerlaqqillutik ilinniarnerni naammassisariaqarput, kisiannili piginnaasaqarluni ilinniaqqinnissamullu piumassuseqarluni meeqqat atuarfianni naammassinissaq aallarniutaasapput.

-Atuarfigut nunami sumi najugaqarneq apeqqutaalluni assisiinngitsunik periarfissaqarnerat qaffasissuseqarnerallu Kalaallit Nunaanni Aningaasaqarnermut Siunnersuisoqatigiittulli eqqarsarnartoqarteqaara. Nunaqarfimmi mikisumi inunngorsimanerit pissutaalluni meeqqat atuarfinni naammassiguit ajornerusumik inissisimanissat akuersaarneqarsinnaanngilaq ilumoorsinnaananilu. Inuusuttortagut tamaasa inuusuttut ilinniagaannut ingerlaqqissutaasinnaasumik piginnaasaqalersittariaqarpagut. Taamaanngippat suli inersimasunngoratik siunissami suliffeqarnissami kingulliutinneqalersissavagut. Tamanna inuusuttut inuunerannik maangaannartitsineruvoq periarifissanillu maangaannartitsinerulluni, inuusuttunut uagutsinnullu inuiaqatigiittut.

-Taamaammat atuarfigut ataasiakkaat tamaasa misissuiffigisariaqarpagut – suna ingerlalluarpa sunalu ingerlalluanngila. Misilittakkat pitsaasut allani atussavagut. Atuarfiit unammilligaannik aaqqissuussamik ikiortariaqarpagut.

-Siunnersuisoqatigiit siunnersuinerattut atuarfiit najukkanilu inuussutissarsiortut attaveqarnerat pitsanngortissavarput, inuusuttut taamaalillunik inuusuttut ilinniagaannik toqqaasussanngorunik misilittagaqalersimaniassammata – toqqaanissaminnut ajornannginnerulersitsisumik. Taamaalillutik siunissami sulifissatut suna takorloorsinnaanerlugu – takorloorsinnaannginerluguluunniit – isummersinnaalluarnerulersinnaaniassammata.

– Atuarfiit pitsanngorsaatitissatut periarfissanik siunissami siunnersuuteqarfigineqartarnissaat pingaaruteqarpoq, tamannalu nakkutilleeriaatsimut piumasaqaateqarfiuvoq. Maannami ajornartorsiutaasut oqaatigineqartarput, aaqqiissutaasinnaasunilli tikkuussisoqartarani. Tassa atuarfiit ingerlaqqeriarnissaannik ikiorniarlugit iliuuseqarnerusinnaavugut – oqartussat, atuarfiit, angajoqqaat najukkanilu innuttaasut qanimut suleqatigiinnerisigut.

-Nalunaarusiami Kalaallit Nunaata aningaasaqarnerata inissisimaneranik siunissamilu ajornartorsiutissanik sukumiisumik pingaaruteqartunillu erseqqissaasoqarnera Inuit Ataqatigiit nuannaarutigaa, Asii Chemnitz Narup naggasiivoq.

DEL

Del på Facebook
Del på Twitter
Del på Linkdin

Skrev en kommentar

Scroll to Top