Inuit Ataqatigiit inummik piumassuseqqortuumik allaffimmiussarsiorpoq

Inuit Ataqatigiit nunatta partiivini annersaallunilu siuttuuvoq, nunatta politikikkut aqunneqarnerani siammasissumik inissisimasoq. Inuit Ataqatigiit Naalakkersuisooqatigiinnermi arfineq-marlunnik Naalakkersuisuutitaqarnermigut siuttuuvoq, Inatsisartuni aqqaneq marlunnik ilaasortaqarnermigut annersaalluni, soorluttaaq nunatsinni borgmesterinit tallimanit issiaviit pingasut tigummigai.

Illit:

Inuit Ataqatigiit qiimasumik takkuttuaannartumik ullullu tamaasa nutaanik misigisaqarusuttumik nutaanillu ilinniagaqarusuttumik allaffimmiussarsiorpoq. Inuit Ataqatigiinni allaffimmiutut atorfik inummut aalajangersinnaassusermik aaqqissuussaanerullu suliassaqarfiinik tamanik eqqummaarissussamik piumaffiginnittuuvoq.

Pisinnaasat:

Naatsorsuutigaarput;

  • allaffissornermi naatsorsuuserinermilu ilinniarsimasuussasutit.
  • IT-nik atuinermi misilittagaqartutit, soorlu Outlook, Word aamma Excel.
  • sulianik ilusilersuillaqqissuusutit suliartortuaannartuusutillu.
  • politikkikkut aalajangeeriutsinik suliaqarusussuseqartuusutit.
  • kalaallisut oqaaseqartuusutit, danskisut tuluttulluunniit aamma oqalussinnaaguit pitsaaqutaaginnassaaq.

Aaqqissuussaanikkut inissisimaffik:

  • Allaffimmioq Partiip allattaanut toqqaannartumik ulluinnarni attaveqaateqassaaq.

Akisussaaffiit piginnaasaqarfiillu:

  • Allattoqarfimmi ulluinnarni ingerlatsisoq.
  • Allattoqarfiup pisiniarnerinut peqqumaasiveqarneranullu ingerlatsisoq.
  • Allattoqarfiup pisortaa qanimut suleqatigalugu partiip naatsorsuusiuunnerani ingerlatsisoq.
  • Allattoqarfiup pisortaa qanimut suleqatigalugu partiip ukiup affakkaartumik ilumini naatsorsuusiuunnerani ingerlatsisoq.
  • Allattoqarfiup journalsystemianik taamatullu journaliserineranik ingerlatsisoq.
  • Partiip debitoriinik kreditoriinillu attaveqarnermut ingerlatsisoq.
  • Partiip mailianik ingerlatsisoq.
  • Allattoqarfimmut allakkanik anisunik isertunillu ingerlatsisoq.

Suliassat aalajangersimasut:

  • Ulluinnarni allaffissornermi suliassat, soorlu fakturalerineq, bilagilerineq il.il..
  • Allattoqarfiup pisiniartartua, soorlu allaffimmi atortunik.
  • Allattoqarfiup peqqumaasivianik peqqumaasiveqarneranillu aqutsisoq.
  • Allattoqarfiup pisortaa qanimut suleqatigalugu partiip naatsorsuutaanik ataavartumik nutarteriuarneq.
  • Allattoqarfiup pisortaa qanimut suleqatigalugu partiip ukiup affakkaartumik ilumini naatsorsuusiuunneranik suliaqarneq, taamatullu suliat taakku partiip Ulluinnarni Aqutsisuinut saqqummiunnerani peqataaneq.
  • Partiip journalsystemiata nutartertuarnera, soorlu partiip avataani naatsorsuuserisua suleqatigalugu sulineq.
  • Partiip kreditoriinik attaveqarneq.
  • Partiip debitoriinik attaveqarneq.
  • Partiimut ilaasortat partiimut akiliutaannik katersineq.
  • Partiimut allakkat isaasut akisussaaffigineri, papiratiguuppat digitaliuppalluunniit.
  • Allakkanik poortukkanillu nassiussuinerit.

Naatsorsuutigisat allat:

Partiip allattoqarfia innuttaasunit, suliffeqarfinnit politikkerinillu assigiinngisitaartunit attavigineqartarpoq. Allaffimmiup allattoqarfimmi sulisut allat Partiillu allattaa peqatigalugit pitsaasumik qaffasissusilimmik sullissineq ingerlatissavaa, taamaaliornikkut innuttaasunut, suliffeqarfinnut aammalu politikerinut allanut attaveqarneq pitsaasoq pilersillugulu piujuaannartinniarlugu suleqataassalluni.

Tamatuma saniatigut allaffimmiumut Partiip allattaata qanimut attaveqarfigiuarnissaa naatsorsuutigineqarpoq.

Neqeroorutigaarput;

  • suliffik pitsaasoq, iseruminartoq ilaatigullu ulapaarfiusinnaasartoq taamaakkaluartorli pitsaasumik ataqatigiiffiusoq.
  • suliffik inuiaqatigiinni assigiinngissusermik naligiisitaanermillu pingaartitsisoq.
  • suliffik sulianik namminersuuteqarluni sulinermik, pisinnaasanik ineriartortitsinermik suliffeqarfimmilu aalajangeeriutsinut sunniuteqarsinnaanermik periarfissiisoq.

Atorfeqartitaanermut atugassarititat:

Aallaavittut inunnut ataasiakkaanut isumaqatigiissutit aallaavigalugit atorfinitsitsisoqassaaq.

Suliffik tassaavoq Inuit Ataqatigiit Kattuffiat, Nuuk.

Sulilernissaq kissaatigineqarpoq 1. november 2021 imaluunniit sukumiinerusumik isumaqatigiissuteqarnikkut pisinnaajumaarpoq.

Ineqarneq

Atorfimmut atasumik inissaqartitsisoqanngilaq.

Paasissutissat erseqqinnerusut

Inuit Ataqatigiinni allaffimmiuuneq takorloorsinnaagukku, paasissutissanillu sukumiinerusunik pissarserusullutit, taava Immikkut ilisimasalittut siunnersorti Ilannguaq K. Møller oqarasuaat 34 62 70 imaluunniit email ilklm@inatsisartut.gl atorlugit attavigiuk.

Inuit Ataqatigiit pillugit www.ia.gl-mi erseqqinnerusumik paasisaqarit.

Qinnuteqarfissamut killigititaq

Qinnuteqaat kingusinnerpaamik 8. oktober 2021 nal. 12:00 Inuit Ataqatigiinneereersimassaaq.

Qinnuteqaatit ataavartumik suliarisinnaanerannut immitsinnut pisinnaatippugut.

Qinnuteqaat ia@ia.gl-mut imaluunniit Postbox 321, 3900 Nuuk nassiuguk.

Tusarfiginissat qilanaaraarput!

DEL

Share on facebook
Del på Facebook
Share on twitter
Del på Twitter
Share on linkedin
Del på Linkdin

Skrev en kommentar

Scroll to Top