Inuit Ataqatigiit

Ilisimasanik tunngaveqarluta aningaasanut inatsisissamut isumaqatiginninniassaagut

Ilisimasanik tunngaveqarluta aningaasanut inatsisissamut isumaqatiginninniassaagut

Inuit Ataqatigiit, qineqqusaarutitik pimoorullugit suliarissavaat. Siullermeerluta aningaasanut inatsisip suliarinerani, anguniakkagut tamarluinnaasa ataatsikkut naammasisinnaanagit nalunngilarput.

Qineqqusaarutigut amerlapput, meeqqaniit, utoqqarnut suliniutillu allat aamma qiningaaffiup siuliani aalajangiunneqarsimasut suliarissallutigit. Taamaattumik tulleriiutaarneq aamma pingaarnersiuineq, sulinermi pingaaruteqarput.

Ukiup tullianut 2022-mut aningaasanut inatsisiliorneq ukiorli aallatereersoq Naalakkersuisunngortitsinikkut kingornupparput. Piffissap taama sivikitsigisup iluani suna tamaat naammassineqarsinnaanngilaq.

Aalisarnermut isumalioqatigiissitaliorsimaneq aningaasarpassuarnik nalilik, utaqqinissaa pisariaqarpoq, qujanartumilli suliaq naammassilerpoq. Paasissutissanik pisarialinnik pissarsiffiginissaa naatsorsuutigaarput, taamaammat saqqummiussinissaat utaqqimaarusukkatsigu tupigisassaanngilaq, suliassammi imminnut attuumassutillit tamaasa qulaajarluarsimanissaat aalajanginnginnermi pisariaqartarput, kukkuluttorsinnaanerit pinngitsoortinniarlugit.

Minnerunngitsumik aningaasartuutinik pilersitsinermi, qanoq aningaasalersorneqarsinnaaneri aamma nassaarisimanissaat avaqqunneqarsinnaanngimmat.

Tukumanata peqqissaartumik, silatusaartumillu qineqqusaarutigut suliarissavagut. Aningaasanullu inatsisissamut isumaqatiginninniarnissatsinnut piareersimalluta.

– Inatsisartuni gruppeformand Agathe Fontain

DEL

Del på Facebook
Del på Twitter
Del på Linkdin

Skrev en kommentar

Scroll to Top