Erik Jensenip avissaartuutitsinera Nunatsinnut ulorianarpoq

Allattoq Charlotte Ludvigsen, Borgmesteri (IA), Kommuneqarfik Sermersooq

Erik Jensenip avissaartuutitsinera Nunatsinnut ulorianarpoq

Erik Jensenip Siumut siulittaasuattut Nunatsinni qangalili annertuumillu avissaartuutsitsisuusartoq kingumut uummarteqqinniartutullusooq itsinniarsarilerpaa – tassa Nuummiut Nunattalu sinneraniittut unammisutut issasut. Nunatta avissaartuunneq aaqqiagiinnginnerlu pinnagit ataqatigiinnermik suleqatigiinnermillu pisariaqartitsinermini isumaqarpunga avissaartuutitsineq ulorianartuusoq.

Nunatsinni inuit 56.000-t najugaqarput, nunarsuarmioqatitsinnullu sanilliulluta amerlanngilagut. Taamaattumik ataqatigiittariaqarpugut ataatsimoorlutalu inuiaqatigiit pitsaanerulersinnissaannut iliuuseqartariaqarluta. Ima oqaatigineqarsinnaavoq, pissarsiassat assortuussutiginatigit ataatsimoorluta kikkut tamarmik naammattunik pissaqarnissaat anguniarlugu pissarsiassagut anginerutinniartariaqarpavut.

Taamaammat Erik Jensenip nunami maani aaqqiagiinnginnerup anguniarnissaanut sulinera uanga assut uggoraara. Siumut siulittaasortaavata anguniagai naapertorlugit nunami maani tamanut pitsaanerusumik atugaqalernissaq pineqanngilaq, akerlianilli immikkoortut assigiinngitsut inuiaqatigiiaallu akornanni avissaartuunnissaq angujartuaarneqarusulluni.

Namminersorlutik oqartussaniit akisussaaffiit Kommuninut nuussorneqarnissai aammalu Inuiaqatigiit tamaasa nunamilu inoqarfiit tamaasa ineriartortissagivut pillugit Erik Jensen isumaqatigilluinnarpara. Missingersuutit pillugit inatsisitigut nuutsitsinikkullu Nuup ineriartornera aporfilersorlugu tamanna anguneqarsinnaanngilaq. Pissarsiassat angininngortinnerisigut angeqqatigiimmillu agguataarnerisigut tamanna anguneqarsinnaavoq. Sermersuumi taamatut sulivugut. Tasiilami nutaamik qimarnguiliorpugut erniinnarlu kalaalimineerniarfik nutaaq sanaartorneqalissalluni, ukiuni kingullerni Paamiuni suliffissaaleqineq 25 procentimik annikillivarput, tamakkkuupput Nuup avataani ineriartortitarpassuatta assersuutit ilamininngui. Taamatut ineriartortitsivugut Nuummi ineriartortitsineq unitsinngikkaluarlugu, taamaaliornikkummi inuiaqatigiit pitsaasut pissaqarluartullu pitsaanerpaamik anguneqarsinnaagamik – avissaartuutsitsinata ataatsimoorluta ineriartortitseqatigiilluta.

Nuummi innuttaasutut akileraartartutut nammaqatigiinngitsutut nalilerneqarneq paamitsaatiginarpoq. Nunatta sinnerata ineriartortinneqarnissaanut tulluusimaarutigalugu tunniusseqataasuuvugut. Kalaallit Nunaata sinneranut naligiissaarinikkut toqqaannartumik 300 millionit koruuninik ukiut tamaasa akiliisarpugut aamma innaallagissamut, imermut, kiassarnermut, nassiussuisarnernut, oqarasuaatinut internetimullu Nuummi innuttaasut akiliivallaartarnerat ilanngukkaanni inoqarfinni allani tamakku akii appasinniassammata, Sermersooq 1 milliardit missaanni tapeeqataasarpoq. Nuuk illoqarfiit pingaarnersaattut nunap sinneranut tunniusseqataavoq suliffeqarfippassuillu illoqarfimmiit allanut nussorneqaraluarpata tunniusseqataaniarnissarput ajornakusuulissaaq.

Siusinnerusukkut Siumut siulittaasorisimasaasa siuttuunerisa nalaanni avissaartuunneq sakkortuumik misigsareernikuuarput tamannalu misigeqqikkusunnanngeqaaq. Inuiaqatigiinni avissaartuutsitsivoq, nunani tamalaani suleqatigiinnikkut paatsiveerutsitsivoq innuttaasorpassuillu eqqumiitsumik eqqunngitsumillu misigivaat.

Nunarput siuttumik sumiiffinni tamani illoqarfinni nunaqarfinnilu ataatsimoortitsisumik pisariaqartitsivoq. Peqatigiilluta nunarsuarmioqataanissarput nunanilu allamiut Nunatsinni soqutiginnileraluttuinnarnerat ammaffigissagipput Nunatta pisariaqartippaa. Nunatta iluani ataatsimoornata akersuutiinnaraluarutta nunatut nunani tamalaani isumaqatigiinniallaqqittunngorsinnaanatalu atugarissaartunngorsinnaanngilagut. Taamaattumik Erik Jensen kaammattorusuppara ataqatigiilernissamik pilersitseqqullugu, Nuullu nunatta sinneranut ilaatigut akileraarutinik isertitatigut suliffeqarfitsigullu nutaatigut iluaqutaasumik pitsaasumik ineriartornera tikkuartuinnarnagu pissarsiassat annertunerulersinneqarnissaat anguniartariaqaraa.

Uanga nammineerlunga sapinngisannik avissaartuunnissaq anguniarnagu ataqatigiinnissaq anguniassavara.

DEL:

Share on facebook
Del på Facebook
Share on twitter
Del på Twitter
Share on linkedin
Del på Linkdin
Share on email
Del på Mail

Skriv en kommentar

Scroll to Top