Eqqaaniut

All: Inuit Ataqatigiit Kattuffiat sinnerlugu, Inuit Ataqatigiit siulittaasuat Múte Bourup Egede

Eqqaaniut

Inuit Ataqatigiinni ikinngutitta Alfred Jakobsen-ip toquneranik nalunaarut aliasulluta tiguarput. Nunarput inummik tamatigoortumik, inussiarnersumik ilakkuminartumillu annaasaqarpoq. Alfred-ip kikkut tamaasa suleqatigisinnaavai, nukerujussuarlu tamanna pigisani eqqaamaneqaatissaraa.

Alfred-ip Inuit Ataqatigiinni ukiorpassuarni tunniussimalluni suleqatigaatigut. Alfred naalakkersuinermi sulinermiit partiip iluani ataqatigiissaarinermi aqutsisutut suleqatigiuarparput, inullu tamanik inissaqartitsisuugami qiimasuullunilu suleqatigiumaneqarluartuunera uatsinnut iluaqutaasimaqaaq. Ukioq 1999-mi peqqinnissamut, avatagiisinut ilageeqarnermullu naalakkersuisunngorpoq, naalakkersuinikkullu piujuaannartitsilluni pinngortitamik atuineq naleqartillugu sulisimalluni. Tamanna inuttaata ilisimaneqaatigaa. Naalakkersuinikkut sulinermini Pinngortitaleriffiup atuuffimminut atornissaa pingaartillugu sulisimavoq. Taamatuttaarlu pinngortitamik atuisuusut piniartut, aalisartut savaatillillu Pinngortitaleriffiup ingerlanneqarnerani siulersuisuni oqartussaaqataanissaat pingaartillugu suliarisimallugu. 

KNAPK-mi ICC-milu pisortatut tunniusimalluni sulisimavoq, nunarsuarmioqatigiillu ataatsimoorussatut suliarisaanni Alfred sunniuteqartumik peqataalluni sulisuuvoq. Issittumi silap pissutaata allanngoriartorneranut tunngasuni naalakkersuinikkut isumaqatigiissusiornerit misilittagaqarfigai, Kyotomi isumaqatigiissut 2001-imi naalakkersuisutut atsiorneratigut, nunatta nunarsuarmioqataanermut akisussaaqataanera takutissimavaa. Suliaasa ilagilluinnarpaat issittumi nunat inoqqaavisa imartamik atuinerat pillugu sulineq, tamannalu tunngavingalugu issittormioqatitsinnit ataqqineqarluartuuvoq.

Ukiuni kingullerni Ocean North-imi pisortatut suleqataavoq, ilisimasanilu atorlugit issittup imartaata atorneqarneranut sunniutaasut pillugit paasissutissiiuartarsimalluni. Qalasersuarmi imartap aalisarfigeqqusaajunnaarallarneranut annertuumik suleqataavoq. Tamatumalu aamma uppernarsarpaa Alfred tassaasimasoq nungusaataanngitsumik atuinissamut pingaartitsilluinnartoq, Nunattalu nunarsuarmi suleqatigiiffinni sunniuteqaqataalluni oqaloqataanissaanik pingaartitsisoq.

Ikinnguterput Alfred qanilaartuullunilu ilakkuminartuummat maqaasissaqaarput. Inummik inuit pinngortitallu imminnut ataqatigiinnerat pillugu ilisiamaqarluartumik nunarput Issittorlu annaasaqarpoq.

 Inuit Ataqatigiit Alfred annertuumik partiitsinnut tunniusimalluni sulisimanera pillugu qutsavissaqarfigaarput.

Alfred-ip asangaagaanut nulianut Aviâjamut, qitornaanut, ernutaanut, qatanngutaannullu misiginneqataangaarnerput apuukkusupparput.

Alfred Jakobsen-ip eqqaaneqarnera ataqqinartuuli.

DEL:

Share on facebook
Del på Facebook
Share on twitter
Del på Twitter
Share on linkedin
Del på Linkdin
Share on email
Del på Mail

Skriv en kommentar

Scroll to Top

Kommuninut qiningassanngortittut allattorsimaffiat